El Gobiernu d’Asturies constituyó güei’l comité de dirección que se va encargar de poner en marcha’l centru de simulación clínica empobinada a la formación, investigación ya innovación nel ámbitu de la salú. La Conseyería de Ciencia preside esti grupu de trabayu, que va definir el plan funcional pa la creación d’un equipamientu clave pal desenvolvimientu de la innovación biomédica y sanitaria n’Asturies.
El comité ta integráu, amás, pola Conseyería de Salú, la dirección de la Fundación pa la Investigación y l’Innovación Biosanitaria d’Asturies (Finba), l’Institutu d’Investigación Sanitaria del Principáu d’Asturies (ISPA), la Universidá d’Uviéu, la delegación del Conseyu Cimeru d’Investigaciones Científiques (CSIC) n’Asturies, y la secretaria xeneral de la Federación Española d’Empreses de Tecnoloxía Sanitaria (Fenin), qu’arrexunta a les compañíes del sector.
El centru foi impulsáu pola Conseyería de Ciencia, Innovación y Universidá, con una aportación inicial de daqué más de 1,9 millones d’euros nel presupuestu d’anguaño. L’equipamientu va tar amestáu a la Finba y va formar parte del polu biosanitariu que se ta conformando al rodiu del Hospital Universitariu Central d’Asturies (HUCA).
El Centru de Simulación de Tecnoloxíes Innovadores y Procesos Intelixentes va ser una infraestructura de referencia pa la simulación robótica, el videoanálisis, la ciruxía esperimental y la simulación virtual, ente otres metodoloxíes.
El futuru centru ta concebíu y diseñáu pa la formación y entrenamientu de profesionales de la salú, investigadores y estudiantes. Podrán recrease situaciones clíniques por aciu l’usu de tecnoloxíes avanzaes de realidá aumentada y modelos de pacientes virtuales o maniquíes, colos que puedan adquirise habilidaes y competencies nel manexu d’intervenciones complexes, col oxetivu final d’ameyorar la seguridá del paciente.
La constitución del comité director ye’l primer pasu pa la puesta en marcha d’esti centru. Ente les sos funciones atópase afitar la estratexa nel diseñu d’un centru d’estes característiques, de formación en simulación con tecnoloxíes innovadores, y coordinar la evaluación y asesoramientu necesarios pa la puesta en marcha d’esti equipamientu.
Esti comité va encargase, amás, de velar pola xeneración d’un ecosistema que fomente la collaboración ente empreses tecnolóxiques y startups del ámbitu biosanitario. Pa ello, va sofitar en distintos grupos técnicos.
El centru perfílase como punta de llanza nel ámbitu del avieyamientu activo y saludable de la Estratexa d’Especialización Intelixente (S3) y va contribuyir a aumentar l’ecosistema científicu asturianu.
