- La Federación de Muyeres Xóvenes va encargase d’impartir la formación en cuatro alcuentros presenciales a lo llargo del añu pa residentes n’Asturies menores de 30.
- La primer sesión va celebrase n’Uviéu los díes 28 y 29 d’esti mes y va ufiertar un percorríu históricu del movimientu feminista.
El Gobiernu d’Asturies pon en marcha la Escuela Permanente de Muyeres Xóvenes Feministes pa prevenir toles formes de desigualdá y violencia machista y ufiertar un espaciu d’alcuentru, reflexón y sensibilización pa avanzar escontra una sociedá más igualitaria. Les muyeres d’hasta 30 años residentes n’Asturies van poder participar nes sesiones presenciales, que se van celebrar los díes 28 y 29 de mayu n’Uviéu.
La Dirección Xeneral d’Igualdá, impulsora de la iniciativa, diseñó un proyectu con cuatro alcuentros añales, un per cada estación. Asina, la escuela de primavera va estrenar la iniciativa con 12 hores de formación sobre la Hestoria del movimientu feminista y la participación social y política de les muyeres.
La Federación de Muyeres Xóvenes va encargase d’impartir les sesiones formatives, que se van desenvolver nel palaciu del Conde de Toreno mientres la fin de selmana, n’horariu de mañana y tarde. Cada alcuentru dispón de 60 places. Les interesaes pueden inscribise pa la primer sesión nel siguiente enllaz, que va tar operativu hasta’l 26 de mayu:
https://forms.gle/JE8p9VJV6DTXpFAK9
La directora xeneral d’Igualdá, Nuria Varela, y la responsable de coeducación y coordinadora de la escuela, Marian Moreno, presentaron güei el proyectu. “Les muyeres xóvenes demanden espacios seguros nos qu’analizar les situaciones d’opresión, desigualdá y les manifestaciones de violencia polo xeneral y violencia sexual en particular a les que s’enfrenten. Reclamen ferramientes pa encarar esta potente reacción patriarcal qu’amenacia los sos derechos”, esplicó Varela.
La escuela toma como modelu los grupos de autoconciencia. D’esta miente, va ser un espaciu d’articulación colectiva d’esperiencies y conocencies con metodoloxíes participatives que fomenten el diálogu sobre cuestiones de la vida cotidiana de les moces que los afecten pol fechu de ser muyeres. L’oxetivu pasa tamién por crear venceyos de sofitu y acompañamientu.
El programa para les próximes estaciones inclúi los siguientes asuntos: El derecho al bienestar y la salud sexual, Violencia sexual, mujeres jóvenes y ocio nocturno, y La cosificación de las mujeres en el sistema patriarcal. Ta previsto que se desenvuelvan nos meses de setiembre y payares d’esti añu y en febreru de 2023.
Les xóvenes interesaes pueden llograr más información nel perfil de Instagram de la escuela
: @escuelajovenesfeministas, https://www.instagram.com/escuelajovenesfeministas/
La Federación de Muyeres Xóvenes lleva en marcha dende 1986 y foi la primer asociación xuvenil feminista d’Europa, que nació col fin d’ameyorar la calidá de vida de les nueves, atender les sos necesidaes y erradicar les barreres que s’atopen a diariu.
