El Gobiernu d’Asturies va asumir a partir del 1 de xunu la esplotación de les estaciones depuradores d’agües residuales (EDAR) de Villapérez y San Cloyo, dambes nel conceyu d’Uviéu. La conseyería d’Alministración Autonómica, Mediu Ambiente y Cambéu Climáticu sacó a llicitación, al traviés de Cadasa, el contratu pa dambes instalaciones por un importe de 21.880.134 euros y un periodu de cuatro años.
La depuradora de Villapérez ye la más grande d’Asturies y da serviciu a 723.000 habitantes equivalentes de la zona centro, mientres que la de San Cloyo trata gran parte de les agües residuales d’Uviéu y atiende a una población equivalente de 129.000 persones.
Hasta agora, encargóse de la xestion de dambes infraestructures la Sociedá Estatal d’Agües de les Cuenques d’España (Acuaes), qu’encetó delles meyores nelles. Asina, na EDAR de San Cloyo invirtiéronse 14.033.514 euros, de los qu’el 65% foi financiáu pola Unión Europea (UE) al traviés del Fondu de Cohesión del periodu 2007-2013 y el restu, pol Principáu. Na EDAR de Villapérez el gastu xubió a 26.339.086 euros, financiaos nun 68% pola UE y el restu, pol Gobiernu d’Asturies. El conveniu robláu con Acuaes pa la execución d’estos trabayos incluyía la esplotación mientres cinco años de dambes depuradores y precisaba que, tres esi periodu, asumir el Principáu.
Acordies coles directrices recoyíes nel Plan Director de Saneamientu del Principáu, anguaño en trámite d’información pública, el contratu publicáu güei nel perfil del contratante otorga un importante pesu na llicitación a les iniciatives en materia d’innovación ya investigación y esixe unos criterios mínimos de solvencia técnica nesta materia a los licitadores. Amás, van valorase actuaciones d’I+D+i consideraes prioritaries nel citáu plan, tales como la economía circular o l’amenorgamientu de la buelga de carbonu.
El contratu va incluyir tanto la esplotación de les depuradores como la de los colectores y toles sos instalaciones acomuñaes.
