El Principáu llevanta’l la prohibición de plantar pataca en Xixón

Cuaña, el Franco, Xixón, Muros y Tapia pasen a ser consideraos zones tampón

0
169
Hasta agora, l'orixe de la pataca documentárase namás utilizando aproximamientos históricos. / PIXABAY
Hasta agora, l'orixe de la pataca documentárase namás utilizando aproximamientos históricos. / PIXABAY

El Gobiernu asturianu va llevantar a últimos d’esti mes la prohibición de plantar pataca por causa de la poliya guatemalteca nos conceyos de Cuaña, El Franco, Xixón, Muros y Tapia. Estos conceyos van pasar a ser consideraos zones tampón, quier dicise, va poder semase, pero los llabradores van tener que notificar les sos plantaciones pa realizar un siguimientu fitosanitariu.

La directora xeneral de Desenvolvimientu Rural y Industries Agraries, Begoña López, participó en Madrid nuna xunta col director xeneral de Sanidá de Producción Agraria, Valentín Almansa De Lara. Nella, alcordáronse les midíes fitosanitaries qu’adoptar nel programa de desaniciu de la poliya guatemalteca de la pataca. Los datos recoyíos pela rede de trampéu en patacales y almacenes van permitir llevantar la prohibición nestos territorios.

Les restricciones al cultivu caltiénense nos conceyos de Cuideiru, Pravia, Navia y Valdés. Tamién sigue en Castropol, San Tiso d’Abres, Taramundi y A Veiga, nesti casu como una midida fitosanitaria especial. Estos conceyos estremeros ente Galicia y Asturies establécense como un territoriu ensin presencia de cultivu pa que puedan actuar como una barrera fitosanitaria. El Principáu va caltener la rede de trampéu yá establecida pa monitorizar la posible presencia de la poliya, tanto nes zones onde se considera desaniciada como nes que s’atopen en procesu de desaniciu.

Nel 2016 detectóse la presencia de poliya guatemalteca n’Asturies y Galicia, y empezó la llucha pa desaniciala. Les midíes consistieron na prohibición de semar pataques nos conceyos onde la rede de trampéu alcontró focos, que pasaron a ser declaraes como zones infestaes, y n’establecer los conceyos estremeros a estos como zona tampón. Pa qu’una zona dexe de tar considerada como infestada ye menester que nun se produzan captures nos dos últimos años.