El Principáu va empecipiar en 2022 la execución del plan que va garantizar definitivamente’l suministru d’agua a tola población asturiana y los sectores económicos. El proyectu de presupuestos de la Conseyería d’Alministración Autonómica, Mediu Ambiente y Cambéu Climáticu pal próximu añu incorpora una partida de 2,4 millones pa redactar los proyectos destinaos a asegurar el suministru inclusive nos peores escenarios d’escasez d’agües pol cambéu climáticu. Esti conseñamientu inclúyese ente les primeres actuaciones del nuevu Plan Director de Suministru, que va tar vixente hasta 2030.
En xunto, la inversión pa garantizar el suministru valórase en casi 190 millones, que se van executar nos próximos años per parte del Executivu autonómicu, el Consorciu d’Agües d’Asturies (Cadasa) y el Gobiernu d’España, que yá inclúi parte del presupuestu nel tercer ciclu de la planificación hidrolóxica de la Demarcación Hidrográfica Cantábricu Occidental (2021-2027), que se va aprobar llueu.
Los proyectos que se van redactar anguaño son los que van facilitar la conexón del banzáu de Sotu de la Barca cola estación de tratamientu d’agua potable d’Ablaneda, en Corvera, cola fin d’incorporar al sistema de suministru de la zona central los recursos regulaos del ríu Narcea nel banzáu de La Barca. La obra va permitir estender el suministru d’agua qu’empresta Cadasa a otres zones como la mariña oriental, el baxu Nalón o la zona del Caudal-Ayer, que tamién empecipien los sos proyectos esti añu.
El vicepresidente y conseyeru d’Alministración Autonómica, Mediu Ambiente y Cambéu Climáticu, Juan Cofiño, anunció güei esta iniciativa nuna rueda de prensa en Corvera pa presentar les cuentes del so departamentu pa 2022, na que tamién participó la viceconseyera de Mediu Ambiente y Cambéu Climáticu, Nieves Roqueñí.
“Esti primer impulsu presupuestariu al plan de suministru inclúi tamién una partida de 650.000 euros pa empecipiar actuaciones na contorna Ozcos-Eo, cola cuenta de reforzar, en cantidá y calidá, los recursos n’alta de los sos principales sistemes de suministru”, sorrayó Cofiño.
Cadasa va ser un actor clave na execución de les actuaciones, al traviés del so plan estratéxicu d’inversiones, al que va dedicar 130 millones hasta 2030. En 2022 van executase les primeres intervenciones, valoraes en 3,4 millones. El principal proyectu ye’l desdoblamientu del ramal de Silvota, que va movilizar 3,5 millones, de los cualos 1.350.000 euros van gastase l’añu que vien.
En total, la conseyería va dedicar 101,8 millones en 2022 a los programes d’agua, mediu ambiente y cambéu climáticu, un 18,8% más qu’esti añu. D’esa cantidá, 45,6 millones (44,8 %), empobínense a inversiones pa la protección y meyora del mediu ambiente y a obres de suministru, saneamientu y depuración. Esta última cifra supón una medra del 27 % al respective d’esti exerciciu.
A infraestructures hidráuliques destínense 86,1 millones, casi un 10 % más, de los que 36 van empobinase a obres de suministru y saneamientu en 56 conceyos, lo que supón un 12,4 % más qu’esti añu.
Saneamientu y depuración
El proyectu de presupuestos recueye 5,3 millones pa nueves actuaciones de saneamientu y depuración y otros 29 pa siguir coles empecipiaes anguaño. Ente elles, el vicepresidente citó l’entamu de los trabayos de protección frente a aveníes de Les Arriondes, pa los que se conseñen 1,9 millones.
Tamién se va completar el colector d’industriales d’Aboño que, xunto cola actuación del colector de Peña Francia pa la recuperación d’El Ríu Piles, supón una inversión de 1,15 millones en Xixón. Igualmente, van siguir les obres de Nava-Bimenes col saneamientu de Cecea y la construcción de la depuradora, a la que se dediquen 1,25 millones.
N’Avilés, Mediu Ambiente destina 1,28 millones a la reforma del alliviaderu de San Martín. Amás, va acometese l’allongamientu del colector interceptor d’Arnau a Salinas y los ramales secundarios de la zona sureste, en Castrillón, con un importe conxuntu de 650.000 euros.
Pa Mieres conséñense 2,9 millones empobinaos al saneamientu del ríu Millera y la zona alta de Cenera, mesmo qu’a les obres del depósitu de La Ferradura, ente que n’Uviéu van invertise 1,36 millones en dos actuaciones: la renovación del interceptor del Nora, qu’inclúi l’acondicionamientu de la estación depuradora, y la meyora de la rede de saneamientu en Lluniego.
En Siero abórdense distintes obres, con un montante de 800.000 euros, ente les que destaca l’ampliación de la capacidá del interceptor del Nora.
En Navia van invertise 5 millones n’actuaciones de saneamientu y depuración de Veiga y de Anleo, mesmo que nes obres que van solucionar los problemes de saneamientu de la fachada marítima. Tamién va haber fondos pal proyectu del emisariu pa la meyora integral de la ría del Navia.
Coles mesmes, el presupuestu incorpora 850.000 euros pa estender los ramales de saneamientu na marxe derecha de la ría de Villaviciosa y 1,7 millones pa obres en Llanes, como’l saneamientu d’Andrín.
La conseyería va emplegar 600.000 euros n’obres de saneamientu y depuración de La Espina y na meyora de la calidá de l’agua nel depósitu de Salas, ente qu’en Tinéu va invertir 780.000 euros, tanto pal colector interceptor de la Curiscada como pa la depuradora.
Cambéu climáticu y economía circular
Mediu Ambiente dedica una partida de 11,49 millones a la protección y meyora del mediu ambiente, cifra qu’esperimenta un aumentu de más d’un 130 %, frutu del impulsu otorgáu pol Principáu a les polítiques ambientales y de los fondos del Plan de Recuperación, Tresformamientu y Resiliencia d’España, que la so cuantía conseñada nel proyectu de presupuestu de 2022 (7 millones) va dir destinada a acelerar les inversiones p’ameyorar la xestión de residuos en Coxersa y nos conceyos.
El presupuestu de Coxersa xube a 22,1 millones, de los que 17,3 destínense a la construcción de la planta de basura bruta.
Función pública
El presupuestu incorpora daqué más de 5,8 millones destinaos a programes de refuerzu pa la xestión de los fondos europeos Next Generation EU.
El Principáu va aumentar un 2% los sueldos de los emplegaos públicos, magar la partida empobinada a retribuciones xube globalmente un 2,80 % y algama 1.962.634.320 euros. Esta medra produzse, principalmente, p’atender el pagu diversos conceptos, ente los que figura la carrera profesional.
