L’equipu de Xenética Vexetal del Serviciu Rexonal d’Investigación y Desenvolvimientu Agroalimentariu, Serida, participa nel proyectu européu Legume Generation, que va arrancar el próximu 1 de setiembre y que busca impulsar la meyora xenética de les llegumes. L’oxetivu ye llograr nueves variedaes más granibles, con resistencies a plagues y enfermedaes, y afeches a los múltiples desafíos aniciaos pol cambéu climáticu. L’equipu asturianu va trabayar con dos especies: la faba común y l’arbeyu.
El proyectu ta financiáu con siete millones pol programa Horizon de la Unión Europea y va tener una duración de cuatro años y mediu. Un consorciu d’investigación lideráu pol Doctor Lars-Gernot Otto, de la IPK d’Alemaña, y nel que participen 32 equipos de 18 países, va desenvolver el trabayu, que se va centrar en seis lleguminoses importantes pa l’alimentación humano y animal, como soya, faba común, arbeyu, llenteya, altramuz y trébole.
L’investigador Juan José Ferreira, responsable del equipu de Xenética Vexetal del Serida, aseguró qu’esta participación ye “una bona noticia que consolida al equipu a nivel internacional”. Ferreira esplicó qu’esti ye’l cuartu proyectu a nivel européu nel que participa l’organismu dende 2017 y resaltó que “favorez la retención de talentu científicu por aciu la contratación d’un investigador, al empar que dexa impulsar la investigación y desenvolvimientu de dos especies d’interés pal sistema agroalimentario rexonal: les fabes y los arbeyos”.
El Serida va tener un papel relevante en Legume Generation, yá que se va encargar de dos de les once xeres nes que s’estrema’l proyectu. Per un sitiu, va liderar les xeres de formación dientro del consorciu, lo que va dexar la incorporación de ferramientes innovadores p’acelerar la meyora xenética, como caracterizaciones d’altu rendimientu, metodoloxíes omiques, sofitu de la intelixencia artificial (IA) na xestión de datos, amás d’una actualización na normativa europea de protección de variedaes y recursos xenéticos.
Por casu, prevese l’usu de IA como ayuda nel procesu de toma de decisiones en función de los xenes, xenotipos o característiques morfolóxiques y agronómiques. Per otru llau, codirixirá los trabayos cola faba común, nos que tien una dilatada esperiencia.
Amás, l’equipu del Serida, tamién va contribuyir nes xeres rellacionaes col arbeyu. Ente elles, inclúyese la caracterización d’una amplia diversidá europea qu’inclúi les variedaes locales asturianes, de forma que’l proyectu sirva pa impulsar la recuperación y desenvolvimientu d’esti cultivu tradicional na güerta asturiana.
Ferreira esplica que “les llegumes tán llamaes a xugar un importante papel na seguridá alimentaria nel curtiu plazu, especialmente nel contestu del cambéu climáticu. Son especies con baxa buelga hídrica, capaces d’afitar nitróxenu atmosféricu y ameyorar los suelos. Les sos granes son fáciles d’almacenar y nutritivamente son interesante pol altu conteníu en proteínes”, precisó.
Amás, tanto los arbeyos como les fabas representen un recursu pa una diversificación de l’actividá nel mediu rural”. “Esti proyectu, como tolos que desenvolvemos, tamién busca sofitar les producciones locales. Búsquense ferramientes y soluciones como les meyores variedaes pa una producción sostenible, que faiga frente a los retos alimentarios y ambientales qu’enfrentamos col cambéu climáticu”, concluyó l’investigador.
