¿Ye perxudicial pa la salú dormir con plantes? ¿Hai que guardar dos hores de dixestión enantes de metese nel agua? ¿Pierde vitamines el zusmiu de naranxa si nun lo tomes rápido? ¿Ayuda beber agua bien frío pa quitar l’hipu? Son dalgunes de les creencies instauraes na sociedá que formen parte de la esposición urbana Mitos y lleendes de la sabiduría popular, que puede visitase nos campus universitarios d’Uviéu, Xixón y Mieres hasta’l 14 d’abril. L’amuesa, entamada pola Universidá d’Uviéu, tien por oxetivu ayudar a esclariar la validez o falta d’evidencia científica d’estes creencies.
La esposición, patrocinada pol Ministeriu de Ciencia, Innovación y Universidaes, xunto con
Fundación Española pa la Ciencia y la Tecnoloxía (FECYT), incide n’aspectos bien enraigonaos na sabiduría popular y ayuda a estenar duldes sobre la so veracidá o falsedá.
Asina, podemos saber que dormir con plantes nun ye malu, que poner una cebolla xunto a la cama nun sirve pa solliviar la conxestión nasal, qu’hai riesgos si comemos daqué del suelu, anque nun pasaren cinco segundos desque nos cayó o que ye falsu que, si nun alendamos, les ortigues nun piquen. Asina, hasta un total de doce mitos y lleendes qu’integren esta esposición.
Caúnu d’ellos ta acompañáu de referencies a la evidencia científica que sofita o refuga l’afirmación, xunto con pequeñes rimes a manera de recordatoriu que refuercen la veracidá o falsedá del mitu o lleenda popular. Dalgunes d’estes rimas son: «La corte de dixestión nada tien que ver con un bon chapuzón», «Remedios de tou tipu poco-y faen al hipu» o «Entemecer amoniacu y llexía puede arruinate el día». El conteníu d’esta campaña de concienciación social foi ellaboráu polos investigadores José Manuel Montejo Bernardo y Covadonga Huidobro Fernández, de la Facultá de Ciencies de la Educación, y Alfonso Fernández González, de la Facultá de Química de la Universidá d’Uviéu.
Amás, como complementu a la esposición, establecióse una collaboración selmanal con una emisora de radio autonómica que va emitir con periodicidad mensual El Minutu del mitu, un espaciu nel que el ceadores, xuntu col investigador y divulgador Germán Orizaola, de la Facultá de Bioloxía de la Universidá d’Uviéu, van analizar los mitos y lleendes de la campaña.
