Foi profesor, catedráticu, vicerrector y rector de la Universidá d’Uviéu. Fermín Canella y Secades, xurista y escritor, nació’l 7 de xunetu de 1849 n’Uviéu y finó el 22 de marzu de 1924, tamién n’Uviéu. La Universidá d’Uviéu, institución a la que tuvo venceyáu hasta la so muerte, rinde agora tributu al rector Canella dedicando l’añu 2024 a la so figura para conmemorar el centenariu del so fallecimientu. La institución académica programó un ambiciosu programa d’actividaes qu’inclúi conciertos, meses redondes, conferencies, llectures de los sos testos y que va rematar a finales d’añu con una esposición homenaxe al rector Canella.
Ignacio Villaverde, rector de la Universidá d’Uviéu, destacó que l’Añu Canella ye un actu de xusticia escontra un rector que permaneció siempres estrechamente xuníu a la institución académica asturiana. Villaverde recordó que Canella pasó per tolos estamentos universitarios hasta consiguir la máxima distinción. Estudió Filosofía y Lletres y Derechu, doctorar en Derechu Civil y Canónicu, y empezó la so carrera docente como auxiliar na Facultá de Derechu, na que llogró la cátedra en 1876. Foi vicerrector ente 1882 y 1884 y designáu rector ente 1906 y 1914, cargu que tuvo que dexar pa convertise en senador. Villaverde sorrayó que, sicasí, Canella nunca se desligó de la institución. De fechu y tres la so xubilación en 1919, foi nomáu rector honorariu de la Universidá d’Uviéu.
María Pilar García Cuetos, vicerrectora d’Estensión Universitaria y Proyección Cultural, esbilló dalgunos de los puntos más destacaos de la programación del Añu Canella, qu’inda nun ta cerrada na so totalidá. Los actos pa conmemorar el centenariu del so fallecimientu empiecen esti mesmu mes con dos conciertos n’homenaxe al que fuera rector interpretaos pola mezzosoprano Lola Casariego, acompañada pol pianista Julio César Picos. Les actuaciones van tener llugar el miércoles, 20 de marzu, a les 19:00 hores, nel Paraninfu del Edificiu Históricu, y el xueves, 21 de marzu, a les 18:00 hores, nel Pozu Sotón (Samartín del Rei Aurelio). Dambos conciertos formen parte tamién de la segunda edición del ciclu musicUO, que pretende retomar los festivales de música que fueron emblema de la Universidá d’Uviéu nel sieglu pasáu.
Tamién el 21 de marzu, el profesor Julio Carbajo González, profesor del Departamentu de Derechu Priváu y de la Empresa, va ufiertar una conferencia sobro la figura del rector na Aula Magna del Edificiu Históricu.
Mientres el mes d’abril, va desenvolvese la mesa redonda titulada “De l’asturianu de Canella al de güei”, na que se va cavilgar sobre l’aportación del rector a la valorización y recuperación de la llingua asturiana y la evolución d’esi procesu hasta l’actualidá.
Yá en mayu va tener llugar una mesa redonda que, col títulu de “Fermín Canella y la renovación pedagóxica”, va axuntar a dos espertes n’enseñanza, les profesores Carmen Diego Pérez y Aida Tarrón Bañuelos, profesores del Departamentu de Ciencies de la Educación de la Universidá d’Uviéu.
La programación va retomase en septiembre col actu “Dando voz a Fermín Canella”, xuna llectura de testos sobro diverses temes encetaes pol rector Canella nes sos publicaciones na que va participar el personal docente ya investigador de la universidá asturiana. Un mes más tarde, n’ochobre, Ramón Rodríguez, director del Real Institutu d’Estudios Asturianos y exdirector de la Biblioteca de la Universidá d’Uviéu, va ufiertar na Aula Magna del Edificiu Históricu la conferencia “Fermín Canella y les biblioteques universitaries”.
El colofón del Añu Canella va venir de la mano d’una esposición dedicada a encetar la biografía del rector y la so actividá como universitariu y compromisu cola reforma de la institución. Tamién va recoyer dellos datos inéditos estrayíos del so arquivu personal y fotografíes. La vicerrectora d’Estensión Universitaria y Proyección Cultural comentó que l’amuesa va tratar d’ufiertar una visión cercana de la so figura y l’universidá del so tiempu y dala a conocer a la sociedá asturiana. La esposición va acompañase tamién cola edición d’un catálogu.
