L’Ayuntamientu de Xixón presentó’l borrador d’ordenanza d’Igualdá al Conseyu d’Asociaciones de Muyeres de Xixón. Esta ordenanza ta ellaborada pola Dirección Xeneral d’Igualdá en virtú d’un alcuerdu plenariu de payares de 2020.
La finalidá d’esta ordenanza ye establecer los principios xenerales que, en materia d’igualdá ente muyeres y homes, van haber de rexir l’actuación del Ayuntamientu de Xixón y los organismos y entidaes dependientes del mesmu, desaniciando cualquier forma de desigualdá que sufran les muyeres pol fechu de selo y garantizando l’exerciciu real y efectivu de los sos derechos.
Asina, va impulsase’l paulatín tresformamientu de les polítiques públiques cola integración del principiu d’igualdá ente muyeres y homes, y el denomináu enfoque integráu de xéneru. El borrador cunta con un total de 58 artículos, distribuyíos en cuatro títulos.
El primeru de los títulos, destináu a les competencies, funciones, representación y organización municipal en materia d’igualdá ente muyeres y homes, estrémase en dos capítulos. El primeru d’ellos ta dedicáu a definir les competencies y funciones municipales en materia d’igualdá, mientres que’l segundu enfótase n’aspectos organizativos y representativos nel marcu de la organigrama municipal.
El títulu segundu fai referencia a toes aquelles midíes alministratives que tán llamaes a garantizar la incorporación del enfoque integráu de xéneru de forma tresversal na actividá del Conceyu, los sos organismos autónomos y empreses municipales. Dientro d’esti títulu encétense tamién cuestiones organizatives respectu del personal municipal, enunciando los principios rectores qu’en materia d’igualdá ente muyeres y homes tienen d’acompañar la provisión y xestión de los recursos humanos municipales, según la so referencia al Plan d’Igualdá del personal municipal.
El terceru de los títulos enceta los ámbitos d’intervención municipal, estremando ente ámbitos y enfoques, entendiendo ámbitos como espacios d’intervención per parte de les distintes árees municipales y enfoques por fundamentos conceptuales destinaos a promover un cambéu social.
A lo último, el títulu cuartu ocúpase de garantizar la participación de les muyeres na vida político y social de la ciudá. Con referencies tanto al Conseyu de les Muyeres como al movimientu feminista y asociativu de muyeres, reconozse’l llabor conxuntu ya imprescindible na formulación de les polítiques locales en materia d’igualdá ente muyeres y homes y en toles polítiques municipales.
