El Serviciu de Xinecoloxía y Obstetricia del Hospital Universitariu de Cabueñes, cabecera de l’área sanitaria V, implantó’l protocolu asistencial de cesárea acompañada. Trátase d’una manera d’actuar que fortalez el venceyu emocional, nes primeres hores de vida, ente la madre y el so ñácaru, al dexar que permanezan xuntos y garantizar una atención segura.
Esti métodu facilita que la madre y el ñácaru pasen les dos o trés hores posteriores a la nacencia ensin dixebrase más de lo puramente necesario, salvo pa la valoración del neonatu por Pediatría. Amás, van poder tar en compañía d’otra persona, escoyida pola madre, que va collaborar activamente nel cuidu del naciellu. Esti postoperatoriu inmediatu va ser monitorizáu por matrona o pola enfermera de neonatoloxía, según el criteriu del pediatra.
Nos primeros meses de pilotaxe nel hospital xixonés, esti protocolu va aplicase a les muyeres que se sometan a una cesárea programada na que nun s’esperen entueyos pa la madre nin pal ñácaru. Progresivamente va ampliar a toles muyeres a les que se realice una cesárea ensin riesgos añedíos.
Como yá asocede n’otres árees sanitaries, los servicios de pediatría, anestesioloxía y obstetricia coordináronse pa ellaborar el procesu asistencial de la cesárea acompañada, que completa otres llínees de trabayu incorporaes nel procesu del partu, como’l contactu piel con piel tanto n’allumamientos normales como en cesárees.
Hasta agora, el procedimientu que se siguía tres cualquier cesárea implicaba que la madre pasara’l posoperatoriu inmediatu dixebrada del so ñácaru: ella na Unidá de Recuperación Postanestésica (URPA) o na Unidá de Reanimación y el naciellu en Neonatoloxía, onde podía tener contactu piel con piel con una persona escoyida pola madre, pero non con ella. El nuevu protocolu ameyora de forma notable la calidá asistencial.
Cerca del 17% de los 1.200 nacencies que se rexistren añalmente nel Hospital de Cabueñes produzse por cesárea, lo que supon unes 200 cada añu. D’elles, un terciu son intervenciones programaes.
