L’equipu de gobiernu de l’alcaldesa Carmen Moriyón nun caltién les sos declaraciones sobre la posible candidatura de Xixón al Mundial de fútbol masculín más qu’unos díes o unes hores.
Si va unos díes dicíen un non rotundu a la participación del Mundial y poníen na cai la polémica campaña financiada con fondos públicos pa xustificar la decisión, titulada “Gijón es mundial” y na qu’afirmaben “Un Mundial es caro”, agora paecen echase atrás.
El voceru del gobiernu de Xixón, Jesús Martínez Salvador, afirmó que l’equipu de Gobiernu «nun se movió» de la so postura, que ye la de «nun comprometer el futuru de les arques del Conceyu». Martínez Salvador, nun inesperáu xiru de los acontecimientos, esplicó que vería’l mundial como “daqué bien bono” pa Xixón.
L’argumentu que remana agora l’equipu de Moriyón ye’l de pidir a otres alministraciones qu’asuman los costos, “el Conceyu implícase na iniciativa mundialista faciéndose cargu d’un porcentaxe asumible, como nel restu de les candidatures, pero falten los demás».
Piden collaboración al Gobiernu d’Asturies y al sector priváu, «Si hai interés empresarial equí tamos para escuchalos», dixo’l voceru del Gobiernu del Conxeyu, quien repitió que’l Conceyu “nun ye’l que tien de dar el pasu».
Cuando se-y entruga sobre los polémicos cartelos instalaos va menos d’una selmana Martínez Salvador esplicó qu’el so costu foi de 200 euros y que la intención del mensaxe, lloñe de ser de confrontación col Sporting de Xixón, yera «motivacional».
Estos cambios de posición recibieron yá numberoses crítiques, yá que nun dexen contentos nin a los partidarios nin a los detractores de la llegada del Mundial a Xixón y del correspondiente gastu multimillonariu na reforma d’El Molinón. Güei Moriyón diz non, mañana veremos qué pasa.
