El futuru CP de Nuevu Roces en Xixón cunta yá con un novedosu proyectu de construcción presupuestáu en 18,1 millones, la mayor inversión del Gobiernu d’Asturies nun colexu públicu, y con un plazu d’execución de 24 meses. El diseñu sigue los exes que l’alministración educativa aplica na construcción de nuevos equipamientos, acordies con criterios de sostenibilidá y eficiencia enerxética y con espacios flexibles que faciliten l’aplicación d’innovadores metodoloxíes docentes.
La Conseyería d’Educación pretende empecipiar el procedimientu de contratación de les obres a finales de febreru, una vegada completaos tolos trámites. El tiempu medio pa l’axudicación de proyectos d’esta envergadura ye d’ocho meses, polo que la previsión ye que los trabayos empiecen a finales d’añu. L’alministración cunta nel presupuestu de 2023 con una partida de 725.000 euros.
La conseyera d’Educación, Lydia Espina, presentó güei el proyectu acompañada pol so autor, l’arquiteutu Jovino Martínez Sierra. Espina destacó “la so perfecta integración na redolada, l’aprovechamientu educativu de cada rincón interior y esterior, la so idea d’apertura a la comunidá”. Tamién prometió, “dende yá, trabayu y un siguimientu minuciosu para tratar de cumplir al máximu colos plazos previstos”.
El diseñu
El centru educativu va disponer de más de 10.000 metros cuadraos de superficie construyíos, incluyíos les antoxanes, afechos al enclín de la parcela, con trés plantes sobre rasante y un suétanu. Va Tar empobináu a la redolada urbana y de llombu a l’autopista.
El diseñu asitia nel centru xuna pista deportiva semienterrada y cubierta con un planu verde, que dispon d’una grada para 222 espectadores. El centru va cuntar con nueve aules d’Infantil y dieciocho de Primaria, amás d’espacios para nueves tecnoloxíes, música o desdobles. Tamién va tener ximnasiu, vestuariu, comedor, biblioteca, un salón d’actos con aforu para 229 persones, sales de visita y despachos para l’asociación de padres y madres y para l’alumnáu.
Los espacios educativos van ser flexibles para fomentar la convivencia y facilitar la versatilidad d’usos. Esto va suponer qu’haya tabiques móviles insonorizados que dexen l’agrupación de delles aules –les denominaes superaules- y que s’instalen tamién superficies acristalaes. Tamién se van habilitar espacios singulares como una plaza interior, asitiada nel antepar principal, y el fueu de campamentu, un graderíu interior de trés niveles pensáu pa la espresión artística.
El futuru colexu de Nuevu Roces va ser dafechu accesible, con ramples construyíes con un enclín inferior al 6%. El proyectu incluyó les aportaciones específiques realizaes por colectivos venceyaos a persones con discapacidá, como CERMI (Comité Español de Representantes con Persones con Discapacidá).
El proyectu recueye un consumu enerxéticu mínimu, con aerotermia y paneles fotovoltaicos; reaprovechamiento de recursos naturales, como la reutilización d’agües pa riegu; materiales de construcción ecosostenibles, y cubiertes vexetales qu’aisllen del calor. Les fachaes de la zona d’aules van disponer de un entramáu de claves d’aceru pol que va poder engata-y vexetación.
Nel esterior, va haber accesos estremaos. La entrada principal asitiaráse nun atriu abiertu en forma d’O al que se va llegar por un pórticu cubiertu. La zona d’Infantil va tener tamién el so propiu percorríu. El polideportivu, el comedor y la biblioteca van disponer d’accesu independiente pa facilitar el so usu fuera del horariu escolar.
Dientro del recintu habilitaránse trés places d’aparcamientu p’autobuses, 21 pa vehículos privaos y otru específicu de bicicletes. L’arquiteutu preve que se construya con un pavimentu verde de prefabricaos de formigón pa favorecer la so integración paisaxística.
