El sistema permite sollertar nos nos 365 díes del añu de situaciones de riesgu nel llar, como cayíes o xubíes de tensión
La Conseyería de Drechos Sociales y Bientar va reforciar esti añu’l programa de teleasistencia avanzada Cuídate + y va emprestar apoyu a más de 30 persones mayores que viven soles. El proyectu, diseñáu pa promocionar l’autonomía, la seguridá y la salú nel llar por aciu la tecnoloxía, permitió atender a 24 persones en 2020.
La empresa pública Vipasa y Cruz Encarnada empecipiaron esti proyectu de collaboración en 2019 coles mires de fomentar el cuidáu y l’autonomía de les persones vulnerables que viven soles nuna vivienda pública. El programa dota a les viviendes d’una tecnoloxía que da avisu les 24 hores y los 365 díes del añu a Cruz Encarnada énte cualesquier situación de riesgu nel llar, como pue ser una cayida o un aumentu de tensión.
Pa incorporase a Cuídate +, los beneficiarios, amás de vivir solos nuna vivienda pública, han atopase nuna situación de vulnerabilidá, seya pola so edá avanzada, por tener una discapacidá o carecer dalguna enfermedá crónica. A toos se-yos asigna un númberu identificativu que permite recoyer les incidencies que puedan producise y siempres calteniendo la identidá de les persones.
Según los datos rexistraos hasta’l momentu, el 88% de les persones que formaron parte del programa son muyeres y el 12%, homes. La edá de los beneficiarios va ente los 65 y los 80 años. L’añu pasáu xestionáronse 3.500 llamaes al traviés del serviciu.
Distintes modalidaes
El programa permite la instalación de distintes modalidaes nel llar, que se deciden teniendo en cuenta les característiques de cada usuariu. Asina hai una alternativa específica pal fomentu de la salú, otra pa la seguridá y una tercera qu’ufierta una atención integral.
El modelu de salú inclúi un terminal de teleasistencia, una unidá de control remotu, una báscula y un tensiómetru. La instalación de seguridá inclúi un terminal de teleasistencia, cuatro detectores de movimientu y unu d’apertura de puerta. Na modalidá d’integral englóbaense los dos sistemes anteriores completos.
“Los sistemes que s’instalen nos llares permiten analizar el modelu de vida de les persones que viven nelles y les sos rutines. Asina, tenemos en cuenta’l tiempu que pasen nel cuartu o nel bañu y esto déxanos detectar situaciones de riegu”, esplica Maria Montes, xerente de Vipasa.
