La conseyera de Cultura, Política Llingüística y Turismu, Berta Piñán, presidió esti miércoles la primer xunta de la Mesa del Horru. Esti muérganu tien como la so principal finalidá abordar la futura regulación d’horros y paneres pa garantizar el so futuru y protexer el so valor cultural. La Mesa del Horru, promovida dende la Dirección Xeneral de Cultura y Patrimoniu, ta integrada por espertos, profesionales, representantes de l’Alministraciones autonómica y de los conceyos, asociaciones y entidaes de distintos ámbitos rellacionaos col estudiu, la restauración y el caltenimientu d’horros y paneres.
Na so primer xunta, la Mesa del Horru fixo efectiva la so constitución. Presidida pola conseyera Berta Piñán, l’organismu va tener como vicepresidente al director xeneral de Cultura y Patrimoniu, Pablo León. La representación del Gobiernu asturianu complétase con seis vocalíes: la viceconseyera de Turismu, Graciela Blanco; los directores xenerales d’Ordenación del Territoriu y Urbanismu, Alfonso Toribio; de Planificación, Infraestructures Agraries y Montes, Fernando Prendes; y de Política Llingüística, Antón García; la directora de Desenvolvimientu Rural ya Industries Agraries, Begoña López, y el comisionáu pal Retu Demográficu, Jaime Izquierdo.
En representación de la Federación Asturiana de Conceyos (FACC) formen parte de la mesa l’alcalde de Sobrescobiu, Marcelino Martínez, y l’alcaldesa de Colunga, Alejandra Cuesta. Amás, van tar presentes nel organismu’l director del Museu del Pueblu d’Asturies, Xuacu López; el lletráu Iganacio Arias, Enriqueta de Valdés, de la Fundación Cardín; Roberto Álvarez, del Centru d’Interpretación del Horru de Güeñu; Cristina Cantero, de l’Asociación Asturiana d’Antropoloxía y Patrimoniu Etnolóxicu; Fernando Mora, de l’Asociación d’Amigos del Horru; Abel Vega, de la Fundación Cetemas; Ástur Paredes, de la Fundación Belenos; José Ramón Puero, del Colexu d’Arquiteutos d’Asturies; y Mariana Suárez y César Javier Álvarez, de la Dirección Xeneral de Cultura y Patrimoniu.
La mesa va trabayar con una serie de documentos técnicos redactaos nos últimos años pa ellaborar el plan de trabayu afayadizu y abordar cuestiones relevantes que nunca se regularon espresamente, como los usos permitíos, la evolución de les tipoloxíes o la concreción de materiales y sistemes de restauración. L’organismu va tener qu’adoptar decisiones sobre aspectos tan relevantes como si tienen de regulase dende Patrimoniu los horros de nueva construcción, si l’horru nuevu sigue siendo horru, si pueden añadir elementos y siguir considerándolo horru, ente otres cuestiones. Tamién sobre’l so usu, incluyíu l’habitacional, o sobre la posibilidá d’utilizalu como agospiamientu rural singular.
