La conseyera de Cultura, Política Llingüística y Turismu, Berta Piñán, firmó güei l’alcuerdu d’adhesión al Protocolu xeneral de cooperación ente’l departamentu de La Dordoña y Cantabria en materia de Patrimoniu Arqueolóxicu Uníos pol arte, pol qu’Asturies entra de plenu derechu na rede europea de cooperación ente rexones con patrimoniu rupestre declaráu patrimoniu mundial por Unesco.
La firma del documentu, que s’aplazó nel so día por cuenta de la pandemia, llevóse a cabu nel marcu de la xunta de la comisión de siguimientu del protocolu, celebrada nel Parque de la Prehistoria de Teberga, y a la qu’asistieron delegaciones de les distintes rexones axuntaes.
El protocolu al qu’agora s’axunta’l Principáu yá foi firmáu polos gobiernos de Cantabria y Castiella y Llión, el del departamentu francés de La Dordoña y el de Portugal, al traviés de Fundación Côa Parque. Asturies tien un espaciu propiu dientro de la rede pol escepcional valor de les sos cueves con arte rupestre incluyíes en 2008 na llista del patrimoniu mundial de la Unesco: La Peña (Candamo), Llonín (Peñamellera Alta), La Covaciella (Cabrales) y El Pindal (Ribedeva).
La firma del documentu supón p’Asturies la incorporación a una rede de collaboración qu’arrexunta territorios con problemátiques comunes y retos compartíos tocantes al caltenimientu y puesta en valor del arte paleolíticu, y que busca conformar una relación institucional y técnica sólida, que favoreza la cooperación internacional na xestión integral y los usos sostenibles de los sitios con arte rupestre.
El documentu del alcuerdu destaca que’l patrimoniu rupestre asturianu súmase al del restu de les comunidaes axuntaes al protocolu pa revelar “la unidá cultural y la conexón social ente les comunidaes paleolítiques del suroeste européu”, al poner de manifiestu la esistencia de “unes particularidaes y una problemática no referente al caltenimientu, investigación, valorización y espardimientu cultural que incumbren en común a los territorios nos que s’asientan”.
Nel terrén más prácticu, la adhsesión al Protocolu Dordoña-Cantabria va dexar fundamentalmente:
- Participar y beneficiase de la ellaboración de estratexes que favorezan la conservación, valorización y difusión cultural y turística.
- Collaborar na fechura de programes d’actividaes conxuntas y participar, cuándo promoviéndoles, cuándo acoyéndoles. Nel desenvolvimientu del protocolo fáise un programa añal d’actividaes conxuntes qu’involucra a axentes locales y comarcales.
- Valise d’una xestión propicia a les iniciatives locales y colaboratives que puean impulsar una oferta turística internacional basada na promoción de los sitios emblemáticos del arte rupestre.
- Formar parte de proyectos conxuntos que puean concurrir a convocatories europees de financiación nel ámbitu de la investigación arqueolóxica, la investigación aplicada a la conservación y tamién nel de la promoción cultural y turística d’esti patrimoniu cultural.
Na xunta celebrada en Teberga tamién se trató sobro la posibilidá de que puedan axuntase al protocolu los conceyos asturianos qu’alluguen cueves con arte rupestre declaraes patrimoniu mundial, una opción que tamién taría abierta a entidaes que tengan ente los sos fines l’estudiu, caltenimientu o puesta en valor d’esi patrimoniu. La incorporación de los conceyos rique una resolución de l’alcaldía y l’alcuerdu unánime de tolos miembros yá axuntaos.
Amás de la conseyera Berta Piñán y del director xeneral de Cultura y Patrimoniu, Pablo León Gasalla, tamién tuvieron presentes na firma del alcuerdu’l vicepresidente y conseyeru de Cultura de Cantabria, Pablo Zuloaga; el director xeneral de Cultura de Castiella y Llión, Gumersindo Bueno; el presidente de La Dordoña, Germinal Peiro, y la presidenta de la Fundación Côa Parque de Portugal, Aida Carvalho, ente otres autoridaes y responsables d’equipamientos culturales.
