El Gobiernu del Principáu y el Colexu Oficial d’Arquiteutos d’Asturies convoquen el primer congresu sobro igualdá y espacios públicos, que se va volcase na gueta d’alternatives a les actuales formes de socialización asimétriques ente muyeres y homes. Estes xornaes cunten con financiamientu del Plan Corresponsables, del Ministeriu d’Igualdá.
El foru, que va celebrase en formatu presencial y telemáticu del 30 de payares al 2 d’avientu, impulsase dende del Observatoriu d’Urbanismu con Perspectiva de Xéneru, un órganu d’asesoramientu financiáu pol Institutu Asturianu de la Muyer que se punxo en marcha en 2018 cola collaboración de la entidá colexal. Ente los sos fines destaquen la promoción y tutela de la perspectiva de xéneru nel ámbitu de la ordenación del territoriu y l’urbanismu, énte la considerancia de que l’espaciu públicu nun ye neutru y puede reflexar les desigualdaes sociales, pero tamién contribuyir a desaniciales.
La directora xeneral d’Igualdá, Nuria Varela, y el decanu del Colexu Oficial d’Arquitectos d’Asturies, Miguel Casariego, presentaron güei el congresu y convidaron a participar y presentar les sos comunicaciones a personal investigador y profesionales de disciplines como l’urbanismu, l’arquitectura, la socioloxía, la economía, l’antropoloxía, la salú pública, la educación y les humanidaes.
L’I Congresu Interdisciplinariu Territorios corresponsables, igualdá y espaciu públicu plantégase’l retu de planiar l’espaciu compartíu dende la corresponsabilidad. Na planificación urbana, esa corresponsabilidad tien vinculación cola defensa de los equipamientos públicos, según col accesu a la vivienda en condiciones d’igualdá y el diseñu de redolaes que contribuyan a correxir desigualdaes de xéneru en cuestiones rellacionaes cola nacencia, la crianza, el cuidu y l’atención a les persones mayores.
Les xornaes escuerren revisar la tradicional planificación de los espacios públicos, lo que les convierte nun foru d’alderique pioneru. Esti propósitu ye especialmente relevante nel contestu de los actuales retos de la sociedá asturiana: baxa tasa de natalidá, avieyamientu, escasa densidá poblacional y dependencia de la solidaridá intergeneracional. Investigadores ya investigadores de primer nivel, tantu del ámbitu autonómicu como del nacional, formen parte del comité científicu, presidíu pola arquitecta Inés Sánchez de Madariaga.
El congresu va retresmitise en streaming y les actividaes van deslocalizase en diversos allugamientos del territoriu central d’Asturies.
