El Gobiernu del Principáu y el Colexu Oficial d’Arquitectos d’Asturies axunten a partir del miércoles a una trentena de profesionales de distintes disciplines nel primer congresu sobre igualdá y espacios públicos, que se va entornar na busca d’alternatives a les actuales formes de socialización asimétriques ente muyeres y homes. El foru, d’inscripción gratuita, va celebrase hasta’l vienres nel Centru Polivalente Integráu de Llugones.
La conferencia inaugural va empezar a les 18:00 hores y va correr al cargu de la arquitecta Inés Sánchez de Madariaga, presidenta del comité científicu del congresu. Va llevar por títulu Corresponsabilidad, igualdá y espaciu. Al otru día, van empecipiase les comunicaciones y ponencies de personal investigador y profesionales d’ámbitos como l’arquitectura, l’urbanismu, el derechu, la socioloxía, la educación, les humanidaes y la salú.
Amás, mientres les xornaes del congresu, que va rematar el vienres 2 d’avientu, van desenvolvese distintes actividaes culturales paraleles en distintos allugamientos. En concretu, nel IES César Rodríguez de Grau, el pobláu mineru de Bustiellu, en Mieres, el Cine Felgueroso de Llangréu y l’Atenéu Obreru de Villaviciosa.
L’I Congresu Interdisciplinariu Territorios corresponsables, igualdá y espaciu públicu va celebrase en formatu online y presencial y va cuntar con un serviciu d’actividaes pa menores de 16 años pa facilitar la conciliación y l’asistencia presencial de les persones comenenciudes. Toles actividaes, según la inscripción, son gratuites.
El congresu impúlsase dende del Observatoriu d’Urbanismu con Perspectiva de Xéneru, un órganu d’asesoramientu financiáu pol Institutu Asturianu de la Muyer que se punxo en marcha en 2018 cola collaboración de la entidá colexal. Ente los sos fines destaquen la promoción y tutela de la perspectiva de xéneru nel ámbitu de la ordenación del territoriu y l’urbanismu, énte la considerancia de que l’espaciu públicu nun ye neutru y puede reflexar les desigualdaes sociales, pero tamién contribuyir a desaniciales.
Amás, el foru plantégase’l retu de planiar l’espaciu compartíu con corresponsabilidad. Na planificación urbana, esa corresponsabilidad tien vinculación cola defensa de los equipamientos públicos, según col accesu a la vivienda en condiciones d’igualdá y el diseñu de redolaes que contribuyan a correxir desigualdaes de xéneru en cuestiones rellacionaes cola nacencia, la crianza, el cuidu y l’atención a les persones mayores.
Les xornaes escuerren revisar la tradicional planificación de los espacios públicos, lo que les convierte nun foru d’alderique pioneru. Esti propósitu ye especialmente relevante nel contestu de los actuales retos de la sociedá asturiana: baxa tasa de natalidá, avieyamientu, escasa densidá poblacional y dependencia de la solidaridá intergeneracional.
