La Conseyería de Salú va intensificar les midíes pa combatir la epidemia del coronavirus nes residencies de persones mayores. «Yá tán realizándose pruebes diagnóstiques a tolos profesionales y vamos facer estes pruebes a tolos residentes”, aseguró Pablo Fernández Muñiz. La conseyería, que yá intervieno 54 d’estos equipamientos, dobla asina los sos esfuercios de prevención ente’l grupu de población más vulnerable énte’l COVID-19. La conseyería tamién designó un coordinador específicu pa la supervisión de les residencies nes ocho árees sanitaries.
Fernández Muñiz aseguró que l’atención a les persones mayores foi una prioridá desque empezó la crisis. “Son especialmente vulnerables. Dende’l primer minutu d’esta epidemia, trabayemos en coordinación cola Conseyería de Derechos Sociales y Bientar y diose tratamientu afayadizu a estos residentes”. D’equí p’arriba, añedió, “va monitorizase lo qu’asocede minutu a minutu pa que si’l virus entra nun centru, se detecte lo primero posible”.
L’escesu de mortalidá asitia n’Asturies nun 31,7 % nel periodu del 20 al 31 de marzu, frente a una media nacional del 67,6 %
Anguaño, Salú caltién interveníos 54 centros residenciales. Más de la metá, en concreto 26, pertenecen a la rede privada; otros 15 son públicos y 13 más tienen conciertos cola Alministración. Esta intervención consiste en designar un emplegáu públicu pa organizar l’actividá asistencial. Amás, otros 6 centros tresformáronse en dispositivos d’atención sanitaria. Trátase de les residencies de San Pedro de Mallecina (Salas), el Centro Gerontológico Jovellanos (Xixón), el Centro Polivalente de Recursos (CPR) Grau, El CPR Naranco y el Centro Residencial Arco Iris (Uviéu) y el CPR Palacio del Villar (Castrillón).
Salú nomó en caúna de les ocho árees sanitaries a un coordinador específicu de centros sociales residenciales encargáu de supervisar estos equipamientos. Estos profesionales súmanse a los 54 emplegaos públicos designaos como interventores pol Serviciu de Salú del Principáu (Sespa).
Hasta’l momentu, Asturies ta rexistrando unos datos de mortalidá menos negativos que la media del país. L’escesu de mortalidá asitia n’Asturies nun 31,7 % nel periodu del 20 al 31 de marzu, frente a una media nacional del 67,6 %. Esta diferencia increméntase ente les persones mayores de 74 años. Nesti casu, el porcentaxe nel Principáu ye del 32,6 %, mentes que la media nacional algama’l 78,6 %.
