Xixón al día

Etiqueta: 26-M

  • El PSOE afita’l so poder municipal con 53 alcaldíes

    El PSOE afita’l so poder municipal con 53 alcaldíes

    La Federación Socialista Asturiana afita’l so poder municipal como primer fuercia municipal d’Asturies. Los plenos de constitución de les corporaciones locales celebraos esti sábadu diéron-y a los socialistes un total de 53 alcaldíes. Los candidatos del PSOE gobernarán n’Ayande, Belmonte, Boal, Cabrales, Cabranes, Candamo, Casu, Castropol, Corvera, Cuideiru, El Franco, Gozón, Grandas de Salime, Eilao, Llaviana, Muros, Nava, Onis, Pezós, Piloña, Ponga, Pravia, Proaza, Les Regueres, Ribedeva, La Ribera, Santalla d’Ozcos, Santiso d’Abres, Santo Adriano, Sobrescobiu, Somiedu, Taramundi, Tinéu, A Veiga, Vilanova d’Ozcos, Villaviciosa, Yernes y Tameza, Llanera, Ayer, Carreño, Colunga, Degaña, Navia, Parres, Ribesella, Samartín del Rei Aurelio, Siero, Tapia, Valdés y Cangas. Amás, recuperen les alcaldíes de Xixón y Llangréu y revaliden la d’Avilés.

    El secretariu de Política Municipal de la FSA-PSOE, Iván Fernández, valoró la toma de posesión de los alcaldes socialistes. «Volvemos ser la fuerza municipalista más importante n’Asturies. Gobernamos en 53 conceyos, en 37 d’ellos con mayoría absoluta». A xuiciu de Fernández estes cifres «demuestren que’l PSOE ye’l partíu que más se paez a Asturies». Los 53 alcaldes socialistes ponen de manifiestu la confianza de la ciudadanía «porque somos un partíu seriu».

    Felicitación del secretariu xeneral

    «Tol mio ciñu a los 437 conceyales socialistes que güei tomaron posesión del so cargu», manifestó Adrián Barbón. El secretariu xeneral de la FSA-PSOE asistió a la toma de posesión como alcaldes d’Iván Fernández, en Corvera, y de Julio García, en Llaviana. «Sois la nuesa bandera, la meyor representación del nuesu compromisu con Asturies. La nuesa forma de faer política, pegada a la cai, refuerza’l nuesu compromisu col futuru», destacó.

  • L’asamblea d’IX afita’l ‘sí’ a la investidura d’Ana González

    L’asamblea d’IX afita’l ‘sí’ a la investidura d’Ana González

    L’asamblea d’Izquierda Xunida (IX) afitó na tarde del xueves el sí de la coalición a la investidura d’Ana González. El conceyu, que cuntó cola presencia de 97 persones acreditaes, sofitó por unanimidá la propuesta. D’esta manera, Aurelio Martín, l’únicu conceyal col que va cuntar la formación na Casa Conceyu, va apoyar la candidatura de la socialista Ana González a la investidura.

    La sintonía ye plena ente dambes fuercies. Esta selmana, PSOE ya IX ficieron públicu un manifiestu conxuntu nel qu’amosaben el so compromisu de trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista.

    La candidata socialista nun va algamar, salvo sorpresa d’última hora, la mayoría absoluta nel Plenu d’investidura. El sí afitáu pola asamblea d’IX nun-y da a Ana González los votos suficientes pa salir escoyida en primer votación. La socialista nun va cuntar col sofitu de les tres conceyales de Podemos-Equo. La coalición anunció esta selmana la so decisión d’astense. La candidatura lliderada por Yolanda Huergo plantegó al PSOE un decálogu de midíes sobre les que trabayar, pero «los socialistes respondieron postponiendo les conversaciones».

  • PSOE ya IX van alcordar un programa de gobiernu conxuntu

    PSOE ya IX van alcordar un programa de gobiernu conxuntu

    Izquierda Xunida (IX) va votar a favor de la investidura de la candidata del PSOE. Dambes formaciones van trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista. «Hai muchos proyectos qu’impulsar tres los ocho años de paralises de Foru».

    González insitió en que les midíes que se van acometer tendrán de ser frutu d’un alderique sele y fondo, pero sobremanera, d’un trabayu responsable que va empezar el sábadu. Sicasí señaló que l’equipu de gobiernu va trabayar «dende la izquierda» siendo «conscientes de qu’hai cuestiones que van riquir d’un ampliu consensu«. Fizo referencia al plan de víes, proyectu sobre’l qu’aseguró que «intentaráse sumar a tolos grupos políticos».

    Ana González destaca que l’equipu de gobiernu va trabayar «dende la izquierda»

    Respectu al decálogu presentáu por Podemos-Equo y a la posibilidá d’aceptalo de cara a cuntar col votu de los moraos nel plenu del sábadu, González reconoció que prefier dexar les coses fluyir. «Nun ye necesariu un trabayu pocu fondu y pocu seriu col únicu oxetivu de paecer que cuentu con más sofitos de los que tengo», dixo. Nesti sentíu reivindicó la necesidá d’empezar un trabayu de fondura que defina claramente’l presente, pal futuru de Xixón. «El presente nun ye’l 15, empieza’l 16», señaló.

    Ana González emplazó a Podemos a aconceyar na primer selmana de xunetu. Esta posición  llevó a les tres conceyales de la formación morada a tomar la decisión d’astenese nel Plenu d’investidura. Yolanda Huergo, vocera de la coalición, aseguró que «gustáranos concretar los asuntos nos que tamos d’alcuerdu» enantes de la votación.

  • Rubén Hidalgo tamién arrenuncia a l’acta de conceyal

    Rubén Hidalgo tamién arrenuncia a l’acta de conceyal

    Cambéos nel grupu municipal de Foru Asturies pa la llexistalatura nueva. El númberu cuatro de la llista, Rubén Hidalgo, ta acabante de comunicar la so decisión d’arrenunciar l’acta de conceyal. Según informa Europa Press, la intención del actual xerente d’Impulsa ye tornar al sector priváu y asegura tar yá en conversación con daqué empresa. Hidalgo refuga confirmar si la so renuncia a ocupar l’asientu de conceyal nel salón de Plenos de la Casa Conceyu va suponer tamién la so salida de Foru. «Ya se verá».

    Foru foi la tercera más votada nes elecciones municipales del pasáu 26-M. La candidatura d’Álvaro Muñiz llogró sumar 16.803 votos, un 12,37% del total. D’esta manera, la formación pierde l’Alcaldía de la ciudá pasando de ocho a tres conceyales. Hai que recordar que’l cabeza de llista arrenunció va dos selmanes a l’acta pa dexar pasu a Hidalgo. «Nun quiero dexar nin que piense en dexalo», dixo entós a los medios el candidatu.

    La renuncia de Rubén Hidalgo a l’acta de conceyal va facer correr la llista. La siguiente na candidatura de Foru ye la hasta agora conceyala de Educación y Cultura, Montserrat López. El grupu municipal del partíu na Casa Conceyu va quedar formáu por tres miembros del equipu de gobiernu de Carmen Moriyón. Jesús Martínez Salvador, responsable de Turismu, Festexos, Deporte y Mocedá, va exercer de voceru. Va tar acompañáu, amás de por López, por Ana Braña, conceyala saliente de Facienda, Organización Municipal y Empléu.

  • Álvaro Muñiz: «Ana González va tener la oposición que Moriyón nun tuvo»

    Álvaro Muñiz: «Ana González va tener la oposición que Moriyón nun tuvo»

    Foru va llevar a cabu una una «oposición lleal» en Xixón. Álvaro Muñiz tresmitió-y a Ana González que la so formación va tener «la oposición que Carmen Moriyón nunca tuvo: rigorosa y cola mano tendida siempres al diálogu y los alcuerdos». Fízolo mientres un conceyu col Comité Negociador del PSOE de Xixón, que calificó de «cordial y constructivu».

    Muñiz añadió que «Foru, como únicu partíu que gobernó esta ciudá amás del PSOE, va liderar l’alternativa». Aseguró nun compartir «el modelu de los socialistes», pero reconoció «que ye l’escoyíu democráticamente polos xixoneses». Anunció que la formación nun va presentar candidatu a l’Alcaldía y va abstenese na investidura d’Ana González. «Ye un xestu qu’esperamos seya recibíu como una invitación a esi diálogu, esa llealtá institucional que Carmen Moriyón, por desgracia, nunca esfrutó”. Muñiz añadió, amás, que «el trespasu de poder va ser tresparente, llimpio, y sobremanera, lleal a los intereses de tola ciudá».

    Muñiz acudió al conceyu acompañáu polos tres conceyales que van representar a la formación na Casa Conceyu: Jesús Martínez Salvador, Ana Braña, y Rubén Hidalgo. Hai que recordar qu’Álvaro Muñiz renunció al acta de conceyal. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó entós. Y detalló que la so decisión taba motivada pol deséu de que’l númberu cuatro de la llista, Rubén Hidalgo, ocupara un asientu nel Plenu.

  • El PP pierde un senador por Asturies: «Retroceder ye perder»

    El PP pierde un senador por Asturies: «Retroceder ye perder»

    El PP tien un senador menos por Asturies depués del 26-M. La candidatura de Teresa Mallada nes elecciones del pasáu domingu resistió enforma l’emburrión socialista, pero perdió un diputáu. El PSOE duplicó en votu a los populares, que pierden el representante por designación autonómica col que cuntaben na Cámara Alta. La asignación d’estos dos escaños nel Senáu fáise al aplicar el sistema D’Hont al númberu de miembros de los grupos parlamentarios.

    La presidenta del Partíu Popular d’Asturies, Mercedes Fernández, llamó a la «reflexón» nel so analís de los resultaos del 26-M n’Asturies, realizáu na so intervención inicial nel Comité Executivu Autonómicu del PP, celebráu n’Uviéu. N’él, felicitó a los candidatos que llograron la mayoría absoluta nos sos conceyos y a aquellos que, ganando les elecciones, van precisar de pactos pa gobernar.

    «Los electores reconócennos na austeridá del gastu públicu, l’amenorgamientu d’impuestos y les conductes exemplares»

    «Los electores reconócennos na austeridá del gastu públicu, l’amenorgamientu d’impuestos y les conductes exemplares», afirmó la líder del PP. La presidenta llamentó que, con esos resultaos, los dos senadores asturianos por designación autonómica seyan del PSOE, daqué que nunca asocediera hasta la fecha.

    Mercedes Fernández, énte la «escesiva diferencia» col PSOE, espunxo que la resultancia electoral «nun foi bonu». «Tolo que ye sumar ye ganar, pero tolo que ye recular ye perder», aseveró. El votu esterior confirmó esi enclín. «Hai espertos en comunicación política que dicen que la meyor campaña ye aquella que ye difusa; yo toi en desalcuerdu, hai qu’escoyer cuatro o cinco temes, de forma machacona, y marcar l’axenda», razonó, poniendo como exemplu «la eliminación del Impuestu de Socesiones«.

    A nivel nacional y sobre les resultancies del PP, la presidenta aseguró que les últimes resultancies supunxeron una meyora respecto a la «llombada» de les xenerales. «L’autocomplacencia inxustificada paraliza la meyora», añadió.

  • PSOE y Ciudadanos descarten un alcuerdu d’investidura

    PSOE y Ciudadanos descarten un alcuerdu d’investidura

    PSOE y Ciudadanos (Cs) descarten un alcuerdu que se traduza nun sofitu per parte de la formación naranxa a la investidura d’Ana González como alcaldesa de Xixón. Ye la principal conclusión del conceyu manteníu esti xueves pela tarde entre dambes formaciones. La xunta foi «cordial» y nella dambes fuerces polítiques manifestaron la so disposición a «practicar un diálogu constructivu». Los dos partíos sí manifestaron la so disposición a adoptar alcuerdos puntuales a lo llargo del mandatu y a siguir dialogando.

    Trátase de la primera de les xuntes de la ronda prevista pol PSOE, empezando pola segunda fuerza más votada nes elecciones municipales del domingu y en sentíu descendente. La comisión negociadora de l’Agrupación Municipal Socialista de Xixón ta integrada pol secretariu xeneral, Iván Fernández Ardura, el vicesecretariu xeneral, Francisco Blanco, el secretariu d’organización, Roberto Lena, y el númberu trés de la candidatura municipal, Natalia González. Per parte de Ciudadanos asistieron los cuatro conceyales electos, José Carlos Fernández Sarasola, Rubén Pérez, Ana Isabel Menéndez y Mara Simal.

    Ana González podría ser investida alcaldesa llogrando la mayoría absoluta de los votos  o con una mayoría simple al ser la llista más votada. La candidata tien previsto siguir la ronda de contactos col grupos que van constituyir el próximu Plenu sacante Vox. «Somos formaciones antagóniques».

  • Daniel Ripa, sobre’l 26-M: «Tócanos cambiar coses»

    Daniel Ripa, sobre’l 26-M: «Tócanos cambiar coses»

    «Lo que toca cuando les resultancies nun son los esperaos ye escuchar a la xente p’ameyorar y camudar coses». Daniel Ripa analizó esti miércoles n’Uviéu los resultaos electorales del 26-M. Podemos perdió nestos comicios más de la metá de la representación na Xunta Xeneral, pasando de nueve a cinco diputaos. «Tócanos escuchar a la xente p’ameyorar y camudar coses, avanzando y trabayando muncho, reforzando la organización, abriendo un diálogu, trazando estratexes al mediu plazu, con mayor implicación social y más apertura». El secretariu xeneral de la formación morada compareció énte los medios de comunicación en compañía d’Andrés Fernández Vilanova, diputáu saliente y responsable d’Organización, y de Nuria Rodríguez, vocera autonómica del partíu y diputada electa.

    Daniel Ripa anunció la convocatoria pa esti sábadu d’una xunta del Conseyu Ciudadanu y del Conseyu Territorial de Podemos Asturies pa valorar unos resultaos que, «ensin ser los qu’esperábamos», asítiense como «los meyores de Podemos» en toles comunidaes autónomes. «Somos l’únicu llugar onde se superó la barrera del 10% nel Parlamentu, l’únicu onde la suma de Podemos y d’Izquierda Xunida supera la suma de les elecciones xenerales». Reconoció que «hubo una baxada xeneralizada en toles comunidaes y en toles ciudaes, que tien enforma que ver con una inercia de les elecciones xenerales onde la victoria de Pedro Sánchez asitióse tamién nel restu d’elecciones d’esti ciclu».

    «La victoria de Pedro Sánchez asitióse tamién nel restu d’elecciones d’esti ciclu»

    A pesar d’ello, aseguró, «les resultancies déxennos tener fuerza nel Parlamentu asturianu, porque’l PSOE sigue ensin cuntar cola mayoría pa gobernar. Y a nivel municipal nuesa presencia pasa de 22 a 23 conceyos, amenorgando daqué’l númberu de conceyales». Recordó que «nestos cuatro años consiguimos ésitos, tantu a nivel municipal como autonómicu. Nel Parlamentu asturianu consiguimos devolver a les families la delda del ERA, plantegar midíes contra les llistes d’espera sanitaries, amenorgar les matrícules de 0 a 3 y universitaries, impulsar procesos xudiciales en casos de corrupción… Y son llogros que se van a caltener». Refirióse tamién a les resultancies electorales d’Izquierda Xunida y afirmó que «pa nós nun ye una bona noticia la potencial perda del grupu parlamentariu d’IX». Por ello, manifestó, «apostamos por que nun se produza. Tamos por buscar soluciones pa que xuntos avancemos en busca d’una Asturies que vaiga meyor».

    Pela so parte, Nuria Rodríguez esplicó que «tamos equí pa faer política pa la ciudadanía. Lo único qu’importa son les polítiques de cambéu, les que pueden faer que la xente ameyore la so situación. Porque Asturies ta nun momentu críticu, cada selmana hai nueves trabayadores que ven apeligrar los sos puestos de trabayu». Por tanto, alvirtió, «quien quiera xugar al intercambiu de cromos, a intereses de sillones y de sielles, que lo faigan so la so responsabilidá». Sobro les resultancies electorales collechaos pol partíu moráu, aseguró que «nun ye innecesariu focalizar la responsabilidá en nenguna persona en concretu. De lo que se trata ye d’analizar con criteriu p’avanzar y p’ameyorar la situación».

    Andrés Fernández Vilanova queda fuera de la Xunta al nun consiguir representación na circunscripción occidental

    Andrés Fernández Vilanova, diputáu saliente pola circunscripción occidental, señaló que «despídome como parlamentariu dempués de cuatro años bien intensos. Esta vegada nun pudo ser, yera difícil pero teníamos qu’intentar de toes toes sacar representación nel oriente y nel occidente. Sicasí, estos territorios van siguir teniendo la so voz enriada al traviés de Podemos nes instituciones». Amestó que «defendimos les necesidaes de la vida nesos territorios y, nel mio casu particular, engarré contra la corrupción nel sistema sanitariu y por una sanidá meyor. Hai munches coses que dexamos feches y esto danos una prestu enorme».

    Quixo estimar amás «l’honor de poder representar a la xente del Occidente y de poder engarrar pola sanidá pública mientres estos cuatro años. Agora vuelvo a la mio vida profesional, porque quien entramos en Podemos facer pa sirvir a Asturies, non pa sirvinos d’ella. Creemos que la política ye un mediu pa camudar y ameyorar la vida de la xente, non pa vivir d’ella». Y dexó claro que «a quien na nueche electoral frotaben les manos al ver el descensu de Podemos diría-yos que nun rieren tantu, porque agora, anque tengamos menos diputaos, sabemos muncho más, conocemos les sos trampes, los sos procedimientos d’engañu, y vamos siguir desatapándolos».

  • Moriyón renuncia a ser diputada pero va siguir lliderando Foru

    Moriyón renuncia a ser diputada pero va siguir lliderando Foru

    Carmen Moriyón renuncia a l’acta de diputada. La candidata de Foru Asturies a la presidencia del Gobiernu d’Asturies asumió esti miércoles como propios los malos resultaos del partíu nes elecciones autonómiques del pasáu domingu y anunció al so intención de nun ocupar l’escañu que-y correspuende na Xunta Xeneral. «Cuando se llogra una derrota en política, dimítese. Ye lo que procede facer, anque nun sía la práctica habitual», resaltó.

    La tovía alcaldesa de Xixón en funciones aseguró qu’entró en política «col deséu y l’ilusión de contribuyir a camudar fechos y usos de la política«. Aseguró sentir «una alcordanza imborrable con toles persones que trabayaron conmigo y tanta xente que me paró pola cai pa dame ánimos».

    [Llea’l comunicáu íntegru de Carmen Moriyón]

    Moriyón llamentó «los erros que pudiera cometer», pero aseguró que va siguir como presidenta de Foru. «Sigo creyendo nesti proyectu. Débo-ylo a los más de 34.000 asturianos que colos sos votos dexáronnos llograr 49 conceyales en 21 conceyos». Comprometióse a «favorecer los cambeos necesarios» nel partíu «p’afaenos al nuevu escenariu políticu y a lo que la sociedá asturiana demanda». Y defendió que la so formación ye «l’únicu partíu con un proyectu y una ideoloxía propia más allá de personalismos: Asturies nel centru y centraos n’Asturies».

    La renuncia de Carmen Moriyón a l’acta de diputada va suponer la so vuelta a la plaza de Ciruxía Xeneral nel Hospital de Cabueñes. Una marcha que coincide nel tiempu cola decisión del candidatu de Foru a l’Alcaldía de Xixón, Álvaro Muñiz, d’arrenunciar al acta de conceyal pa dar pasu a Rubén Hidalgo.

  • Álvaro Muñiz céde-y el puestu de conceyal a Rubén Hidalgo

    Álvaro Muñiz céde-y el puestu de conceyal a Rubén Hidalgo

    Álvaro Muñiz nun va recoyer l’acta de conceyal. El candidatu de Foru Asturies a l’Alcaldía de Xixón anunció esti miércoles pela tarde la so renuncia. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó. Detalló que la so decisión vien motivada pol so deséu de que’l númberu cuatro de la llista, Rubén Hidalgo, ocupara un asientu nel Plenu.

    «Toi seguro que l’equipu formáu por Jesús Martínez Salvador, Ana Braña y Rubén Hidalgo ye l’únicu nel Conceyu que va poder realizar una oposición calidable», aseguró en rueda de prensa. Y insistió en que la so decisión «nun ye un pasu atrás». Muñiz esplicó que Jesús Martínez Salvador va ser la voz del partíu nel Plenu y descartó que vaya haber bicefalia porque «tamos en constante comunicación».

    Álvaro Muñiz afirmó que los socialistes nun a atopar «sorpreses» na so llegada a la Casa Conceyu. «Van encontrase con una situación muncho meyor de la que dexaron», dixo. El candidatu forista valoró d’esta manera la xestión de la que tovía ye alcaldesa en funciones, Carmen Moriyón, que güei anunció la renuncia a l’acta de diputada pa tornar a la so actividá como ciruxana nel Hospital de Cabueñes.