Xixón al día

Etiqueta: elecciones

  • Daniel Ripa, sobre’l 26-M: «Tócanos cambiar coses»

    Daniel Ripa, sobre’l 26-M: «Tócanos cambiar coses»

    «Lo que toca cuando les resultancies nun son los esperaos ye escuchar a la xente p’ameyorar y camudar coses». Daniel Ripa analizó esti miércoles n’Uviéu los resultaos electorales del 26-M. Podemos perdió nestos comicios más de la metá de la representación na Xunta Xeneral, pasando de nueve a cinco diputaos. «Tócanos escuchar a la xente p’ameyorar y camudar coses, avanzando y trabayando muncho, reforzando la organización, abriendo un diálogu, trazando estratexes al mediu plazu, con mayor implicación social y más apertura». El secretariu xeneral de la formación morada compareció énte los medios de comunicación en compañía d’Andrés Fernández Vilanova, diputáu saliente y responsable d’Organización, y de Nuria Rodríguez, vocera autonómica del partíu y diputada electa.

    Daniel Ripa anunció la convocatoria pa esti sábadu d’una xunta del Conseyu Ciudadanu y del Conseyu Territorial de Podemos Asturies pa valorar unos resultaos que, «ensin ser los qu’esperábamos», asítiense como «los meyores de Podemos» en toles comunidaes autónomes. «Somos l’únicu llugar onde se superó la barrera del 10% nel Parlamentu, l’únicu onde la suma de Podemos y d’Izquierda Xunida supera la suma de les elecciones xenerales». Reconoció que «hubo una baxada xeneralizada en toles comunidaes y en toles ciudaes, que tien enforma que ver con una inercia de les elecciones xenerales onde la victoria de Pedro Sánchez asitióse tamién nel restu d’elecciones d’esti ciclu».

    «La victoria de Pedro Sánchez asitióse tamién nel restu d’elecciones d’esti ciclu»

    A pesar d’ello, aseguró, «les resultancies déxennos tener fuerza nel Parlamentu asturianu, porque’l PSOE sigue ensin cuntar cola mayoría pa gobernar. Y a nivel municipal nuesa presencia pasa de 22 a 23 conceyos, amenorgando daqué’l númberu de conceyales». Recordó que «nestos cuatro años consiguimos ésitos, tantu a nivel municipal como autonómicu. Nel Parlamentu asturianu consiguimos devolver a les families la delda del ERA, plantegar midíes contra les llistes d’espera sanitaries, amenorgar les matrícules de 0 a 3 y universitaries, impulsar procesos xudiciales en casos de corrupción… Y son llogros que se van a caltener». Refirióse tamién a les resultancies electorales d’Izquierda Xunida y afirmó que «pa nós nun ye una bona noticia la potencial perda del grupu parlamentariu d’IX». Por ello, manifestó, «apostamos por que nun se produza. Tamos por buscar soluciones pa que xuntos avancemos en busca d’una Asturies que vaiga meyor».

    Pela so parte, Nuria Rodríguez esplicó que «tamos equí pa faer política pa la ciudadanía. Lo único qu’importa son les polítiques de cambéu, les que pueden faer que la xente ameyore la so situación. Porque Asturies ta nun momentu críticu, cada selmana hai nueves trabayadores que ven apeligrar los sos puestos de trabayu». Por tanto, alvirtió, «quien quiera xugar al intercambiu de cromos, a intereses de sillones y de sielles, que lo faigan so la so responsabilidá». Sobro les resultancies electorales collechaos pol partíu moráu, aseguró que «nun ye innecesariu focalizar la responsabilidá en nenguna persona en concretu. De lo que se trata ye d’analizar con criteriu p’avanzar y p’ameyorar la situación».

    Andrés Fernández Vilanova queda fuera de la Xunta al nun consiguir representación na circunscripción occidental

    Andrés Fernández Vilanova, diputáu saliente pola circunscripción occidental, señaló que «despídome como parlamentariu dempués de cuatro años bien intensos. Esta vegada nun pudo ser, yera difícil pero teníamos qu’intentar de toes toes sacar representación nel oriente y nel occidente. Sicasí, estos territorios van siguir teniendo la so voz enriada al traviés de Podemos nes instituciones». Amestó que «defendimos les necesidaes de la vida nesos territorios y, nel mio casu particular, engarré contra la corrupción nel sistema sanitariu y por una sanidá meyor. Hai munches coses que dexamos feches y esto danos una prestu enorme».

    Quixo estimar amás «l’honor de poder representar a la xente del Occidente y de poder engarrar pola sanidá pública mientres estos cuatro años. Agora vuelvo a la mio vida profesional, porque quien entramos en Podemos facer pa sirvir a Asturies, non pa sirvinos d’ella. Creemos que la política ye un mediu pa camudar y ameyorar la vida de la xente, non pa vivir d’ella». Y dexó claro que «a quien na nueche electoral frotaben les manos al ver el descensu de Podemos diría-yos que nun rieren tantu, porque agora, anque tengamos menos diputaos, sabemos muncho más, conocemos les sos trampes, los sos procedimientos d’engañu, y vamos siguir desatapándolos».

  • Moriyón renuncia a ser diputada pero va siguir lliderando Foru

    Moriyón renuncia a ser diputada pero va siguir lliderando Foru

    Carmen Moriyón renuncia a l’acta de diputada. La candidata de Foru Asturies a la presidencia del Gobiernu d’Asturies asumió esti miércoles como propios los malos resultaos del partíu nes elecciones autonómiques del pasáu domingu y anunció al so intención de nun ocupar l’escañu que-y correspuende na Xunta Xeneral. «Cuando se llogra una derrota en política, dimítese. Ye lo que procede facer, anque nun sía la práctica habitual», resaltó.

    La tovía alcaldesa de Xixón en funciones aseguró qu’entró en política «col deséu y l’ilusión de contribuyir a camudar fechos y usos de la política«. Aseguró sentir «una alcordanza imborrable con toles persones que trabayaron conmigo y tanta xente que me paró pola cai pa dame ánimos».

    [Llea’l comunicáu íntegru de Carmen Moriyón]

    Moriyón llamentó «los erros que pudiera cometer», pero aseguró que va siguir como presidenta de Foru. «Sigo creyendo nesti proyectu. Débo-ylo a los más de 34.000 asturianos que colos sos votos dexáronnos llograr 49 conceyales en 21 conceyos». Comprometióse a «favorecer los cambeos necesarios» nel partíu «p’afaenos al nuevu escenariu políticu y a lo que la sociedá asturiana demanda». Y defendió que la so formación ye «l’únicu partíu con un proyectu y una ideoloxía propia más allá de personalismos: Asturies nel centru y centraos n’Asturies».

    La renuncia de Carmen Moriyón a l’acta de diputada va suponer la so vuelta a la plaza de Ciruxía Xeneral nel Hospital de Cabueñes. Una marcha que coincide nel tiempu cola decisión del candidatu de Foru a l’Alcaldía de Xixón, Álvaro Muñiz, d’arrenunciar al acta de conceyal pa dar pasu a Rubén Hidalgo.

  • Álvaro Muñiz céde-y el puestu de conceyal a Rubén Hidalgo

    Álvaro Muñiz céde-y el puestu de conceyal a Rubén Hidalgo

    Álvaro Muñiz nun va recoyer l’acta de conceyal. El candidatu de Foru Asturies a l’Alcaldía de Xixón anunció esti miércoles pela tarde la so renuncia. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó. Detalló que la so decisión vien motivada pol so deséu de que’l númberu cuatro de la llista, Rubén Hidalgo, ocupara un asientu nel Plenu.

    «Toi seguro que l’equipu formáu por Jesús Martínez Salvador, Ana Braña y Rubén Hidalgo ye l’únicu nel Conceyu que va poder realizar una oposición calidable», aseguró en rueda de prensa. Y insistió en que la so decisión «nun ye un pasu atrás». Muñiz esplicó que Jesús Martínez Salvador va ser la voz del partíu nel Plenu y descartó que vaya haber bicefalia porque «tamos en constante comunicación».

    Álvaro Muñiz afirmó que los socialistes nun a atopar «sorpreses» na so llegada a la Casa Conceyu. «Van encontrase con una situación muncho meyor de la que dexaron», dixo. El candidatu forista valoró d’esta manera la xestión de la que tovía ye alcaldesa en funciones, Carmen Moriyón, que güei anunció la renuncia a l’acta de diputada pa tornar a la so actividá como ciruxana nel Hospital de Cabueñes.

  • Ana González descarta conversar con VOX: «Somos antagónicos»

    Ana González descarta conversar con VOX: «Somos antagónicos»

    Ana González quier entamar esta mesma selmana les conversaciones colos partíos que llograron representación nes elecciones municipales. L’Agrupación Municipal Socialista de Xixón aprobó esti martes entamar una primer ronda de contactos, anque dexa fuera a VOX. «Les llínees ideolóxiques de dambes formaciones son antagóniques», señalen.

    Esta comisión negociadora va tar encabezada pol secretariu xeneral de l’Agrupación, Iván Fernández Ardura. Acompañaránlu’l secretariu d’organización, Roberto Lena, el vicesecretariu económicu, Francisco Blanco, el númberu trés de la candidatura municipal, Natalia González y la candidata.

    González manifestó que l’oxetivu d’esta ronda de contactos en base al respetu institucional que cree que tien d’esistir ente los grupos que van constituyir el próximu Plenu. Nesti sentíu señaló qu’esisten dos formes pa llegar a l’Alcaldía, llogrando la mayoría absoluta de los votos y con una mayoría simple al ser la llista más votada. Por esti motivu, esplicó, «tenemos de conocer la postura del restu de partíos».

    La candidata socialista recordó que movémonos con naturalidá «nel espaciu ideolóxicu de la esquierda y nel feminismu», como dos llínees infranquiables en cualquier negociación. Coles mesmes destacó que’l PSOE ye una fuerza dialogante y asina lo demostró a lo llargo de los distintos gobiernu ostentó na ciudá

  • Adrián Barbón prioriza la formación de gobiernos locales

    Adrián Barbón prioriza la formación de gobiernos locales

    Adrián Barbón informó en rueda de prensa que, na xunta de la comisión executiva autonómica celebrada esti llunes, aprobóse «l’encargu d’ocupase de les elecciones municipales y de la formación de los nuevos gobiernos locales». El candidatu a la presidencia d’Asturies aseguró que «la nuesa prioridá ye consolidar y configurar alcaldíes socialistes para frenar les polítiques de la estrema derecha».

    Adrián Barbón destacó que «agora priorizamos el trabayu municipal y dempués va venir lo autonómico». Una comisión lliderada por él mesmu trabayará en comuña colos candidatos a les alcaldíes y los secretarios xenerales pa estudiar la politica de pactos. «Queremos ser frenu a l’amenaza de la involución porque hai conceyos d’Asturies que pueden cayer nes garres de la estrema derecha».

    Nesti sentíu, informó que les elecciones municipales del 26M dexaron una resultancia de 38 mayoríes absolutes socialistes n’otros tantos conceyos. «Esta cifra puede medrar hasta 55, dependiendo de si cuayen o non los alcuerdos políticos que s’establezan». Según Adrián Barbón, «esta amplia representacion del poder municipal socialista tendría de faer recapacitar a otros partíos».

    Na xunta de la executiva punxéronse sobre la mesa dellos datos, qu’Adrián Barbón quixo poner en valor. Destacó «que tuvimos 42.000 votos más y tamos percima del 35% por cuenta de que fiximos una campaña cercana y con mensaxes bien claros». Amás, sorrayó que «tenemos la distancia más grande al segundu partíu dende 1983 y más diputaos que la suma de les cuatro dereches». Un respaldu electoral llográu que, a xuiciu del candidatu, «nun ye un regalu, sinón un sofitu para ganar el futuru d’Asturies». Adrián Barbón agradeció’l sofitu y valoró que la resultancia del PSOE «ye un mensaxe contundente al restu de los partíos pola so estratexa d’oposición».

  • Adrián Barbón arrasa: «Ye un resultáu estraordinariu»

    Adrián Barbón arrasa: «Ye un resultáu estraordinariu»

    «Quiero dicir a los asturianos de corazón gracies, gracies de corazón. Ye un enorme honor y una enorme responsabilidá», asina valoró esti domingu Adrián Barbón el trunfu electoral del 26M. Ente galyíos de «presidente, presidente», destacó públicamente’l trabayu de la FSA-PSOE na xornada electoral de los interventores y apoderaos «porque somos un equipu y un proyectu colectivu, y la fortaleza d’esti partíu ta nos nuesos militantes y na xente que confía en nós».

    El candidatu socialista a la presidencia del Principáu amosó la so sorpresa por un resultáu que meyoró les previsiones. La formación suma seis nuevos diputaos y queda a tres escaños de la mayoría absoluta. El PP resiste na Xunta Xeneral con diez diputados, unu menos que va cuatro años. Ciudadanos pasa a ser la cuarta fuercia de la cámara asturiana, con cinco asientos. Podemos fúndese con Lorena Gil, que dexa pel camín cinco de los nueve representantes colos que cuntaba la formación hasta agora. Tamién baxen Izquierda Xunida, que pasa de cinco a dos diputaos, y Foru, que pierde ún. Per primer vegada, Vox algama representación nel parllamentu asturianu, anque queda a les puertes de tener grupu propiu.

    «Valió de fatalismu»

    N’estimando «a la mio familia y amigos más íntimos porque en tou momentu amosáronme’l so ciñu y nunca me faltaron», quixo faer «un brinde bien especial por persones que yá nun tán, polos expresidentes Rafael Fernández y Tini Areces, por Joaquí, militante de Llangréu, y por Marce, un vecín de Llaviana de puerta con puerta. Brindo por ellos porque ellos yá nun pueden brindar».

    «Cuando fui escoyíu secretariu xeneral», remarcó n’otru momentu de la so intervención, «dixi o camudamos o nos camuden. Ende empieza la razón de ser de nuevamente recuperar l’enfotu de tanto de xente, la necesidá de tender pontes y saber escuchar de la sociedá y esti enfotu de recuperar l’enfotu tase encauzando». Nesti sentíu, reclamó la necesidá de «recuperar l’enfotu pa ganar el futuru d’Asturies, pa construyir esa meyor Asturies d’ilusión, enfotu y optimismu, porque valió yá de tantu fatalismu y pesimismu, Asturies precisa optimismu».

    Cola resultancia electoral del 26M, Adrián Barbón sorrayó que «güei empecipiamos una nueva páxina de la hestoria del socialismu n’Asturies, y facer más fortalecíos, recuperando la conexón». Asina, enfatizó que «los 20 diputaos socialistes son una resultancia estraordinaria y los cientos de miles de votantes qu’escoyeron la papeleta del PSOE representen xuna manera de faer política, que ye la que quieren los homes y muyeres d’Asturies».

    Adrián Barbón repitió que la victoria electoral va «dar estabilidá a Asturies, con influencia nel Conseyu de Ministros y nel partíu y dicir que l’axenda política d’Asturies ta de nuevu enriba del Conseyu de Ministros». N’estimando les llamaes de felicitación de los presidentes Pedro Sánchez y de Javier Fernández, el candidatu a la presidencia del Principáu destacó que «tenemos un proyectu y los problemes poner enriba de la mesa porque hai que dar una inyección d’ilusión, porque hai problemes pero tamién podemos dar nueves soluciones».

  • El PSOE barre en Xixón y recupera l’Alcaldia

    El PSOE barre en Xixón y recupera l’Alcaldia

    Folixa na Casa’l Pueblu de Xixón. El PSOE barrió esti domingu nes elecciones municipales y llogró una bultable victoria al sumar once conceyales. La candidatura d’Ana González llogró’l sofitu de 46.465 xixoneses, 11.360 papeletes más que va cuatro años, lo qu-y abre dafechu les puertes de l’Alcadía. La socialista amosóse satisfecha tres conocer el resultáu del escrutiniu. «Siéntome yá alcaldesa».

    El PSOE tendralo fácil pa llograr l’Alcaldía. Ana González va poder ser alcaldesa de la ciudá en solitariu. La suma de les cuatro fuercies de la derecha ye de doce conceyales, una cifra que nun algama la mayoría absoluta (14). La Llei de Réximen Electoral Xeneral establez qu’en casu de nun algamáse mayoría, l’alcaldía ye pal candidatu de la llista más votada. Y nesi casu, Ana González ye la clara ganadora.

    Pactos

    Lo que sí va necesitar la candidata socialista son pactos pa sacar alantre les sos midides. La   próxima alcaldesa de la ciudá va poder buscar la complicidá de Podemos-Equo. La coalición que llidera Yolanda Huergo queda con la metá de los conceyales que tenía Xixón Sí Puede. Dexa pel camín 13.742 votantes, pasa del 21,10% del votu al 11,87% y queda con tres representantes nel Plenu, suficientes pa sumar la mayoría col PSOE. La candidatura Xixón por la Izquierda, d’IX y IAS, tamién vio amenorgada la so representación na Casa Conceyu, al pasar de dos a un conceyal y 3.109 papeletes menos.

    Ún de los grandes trunfadores de la nueche foi Ciudadanos. La candidatura de José Carlos Fernández Sarasola sumó 10.103 votos y tres conceyales, convirtiéndose na segunda fuercia política de la ciudá. Foru pasa a la tercer posición con tres representantes. La candidatura d’Álvaro Muñiz pierde más de la metá de la representación que llograra Carmen Moriyón en 2015. El PP d’Alberto López-Asenjo caltuvo los tres conceyales colos que ya cuntaba. Bon resultáu pa Vox, qu’entra con dos conceyales. Eladio de la Concha atropó 9.517 votos, un 7,01%.

  • Yolanda Huergo: «Nun ye’l resultáu qu’esperábemos»

    Yolanda Huergo: «Nun ye’l resultáu qu’esperábemos»

    Yolanda Huergo nun ocultó esti domingu la so decepción pol resultáu de la coalición Podemos-Equo nes elecciones municipales d’esti 26-M. «Nun ye’l resultáu qu’esperábemos. Cometimos errores y tenemos qu’asumilos», esplicó depués de felicitar al PSOE pol so trunfu. «Tamos onde la ciudadanía nos quixo colocar», aseguró, al tiempu que destacó que los tres conceyales de la formación van ser decisivos: «La nuesa presencia ye importante nes instituciones y tenemos munches ganes».

    Huergo nun quixo entrar en valoraciones, anque achacó’l mal resultáu al arrastre de la victoria socialista nes caberes elecciones xenerales. «Vamos poner tol nuesu enfotu en llevar a cabo les polítques que creemos que tenemos que sacar alantre. «La renta social, les escueles de 0 a 3 son pilancos fundamentales na nuestra manera de tar nes instituciones», concretó.

    «Nun podemos defraudar»

    El secretariu xeneral de Podemos na ciudá, Mario Suárez del Fueyo, valoró esti llunes que la coalición caltuvo 16.118 votos y el 12,8% con tres conceyales. «Nun podemos defraudar a la xente que nos votó. La renta social, la llucha contra la contaminación, la depuradora del Esta… Esi va ser el nuesu trabayu». Del Fueyo llamentó la falta d’entendimientu con Izquierda Xunida pa sacar alantre una candidatura conxunta y nun descartó un pactu con Ana González. «El PSOE tien una mayoría que-y permite gobernar y va ser el PSOE quien decida cómo va xestionar esa mayoría».

  • Aurelio Martín: «Esta vez sí, va haber gobiernu d’izquierdes»

    Aurelio Martín: «Esta vez sí, va haber gobiernu d’izquierdes»

    Deceición na coalición Xixón por la Izquierda. La candidatura formada por Izquierda Xunida y Izquierda Asturiana nun llogró meyorar el resultáu de va cuatro años. La candidatura encabezada por Aurelio Martín quedó a les puertes de caltener el segundu conceyal. «Nun ye un bon resultáu pa nós. Peleamos hasta l’últimu minuto pol segundu conceyal, pero nun pudo ser. Perdimos tamién dos puntos porcentuales. Nun ye lo qu’esperábemos».

    Lo que sí quixo facer esti llunes foi felicitar la candidata del PSOE, Ana González, que meyoró’l resultáu del partíu hasta los once conceyales y va ser la próxima alcaldesa de la ciudá. «Esta vez sí, Xixón va tener un gobiernu d’izquierdes», dixo. Mostróse confiáu en «construyir una ciudá dende esos parámetros». Martín nun quixo entrar en más valoraciones: «Tiempu habrá pa reflexionar d’otres coses nos prósimos díes».

  • Vox entra nel Ayuntamientu de Xixón con dos conceyales

    Vox entra nel Ayuntamientu de Xixón con dos conceyales

    Vox entra per primera vegada nel Ayuntamientu de Xixón. La formación d’ultraderecha consiguió sumar 9.517 votos, el 7,01%, y conviértese na sexta fuercia de la Casa Conceyu per deltantre de Xixón por la Izquierda. Yera la primer ocasión na que’l partíu que llidera Santiago Abascal presentaba candidatura na ciudá.

    El candidatu de la formación a l’Alcaldía de Xixón, Eladio de la Concha, valoró’l resultáu asegurando que entrar nel Ayuntamientu yera «dalgo imposible va ocho meses». L’abogáu xixonés agradez «la colaboración d’un gran equipu de persones que trabayaron incansablemente y con total xenerosidá».

    El candidatu de la formación destaca que ficieron una campaña «ensin medios materiales» y colos «discursos tracamundiaos de los otros partíos y de los medios de comunicación». De la Concha asegura que «agora entama una nueva fase» y pide la collaboración de los simpatizantes. «Tamos en llínea de salida, quédennos cuatro años de trabayu pa que VOX sía realmente conocíu polo que ye: el partíu de la rexeneración de la nuesa patria».