Xixón va sancionar a quien pasien el perru a mas de 200 metros de casa mientres dure l’estáu d’alarma. L’equipu de gobiernu asoleyó esti miércoles un bandu municipal pa regular los paseos de les mascotes. Encamiéntase a realizar paseos curtios pa cubrir les necesidaes fisiolóxiques del animal; evitar el contactu ente los perros y con otres persones; llevar botella d’agua con deterxente pa llimpiar la orina, y bolses pa recoyer les fieces; y priorizar los horarios de menor arribación.
Nuna nota de prensa, el Conceyu asegura que detectóse «cierta picaresca» col oxetivu de burllar les restricciones de movilidá. «Detectóse l’aumentu del númberu de paseos diarios al mesmu perru, pola mesma o otra persona; la realización de paseos llargos; y una desdexación de responsabilidaes na recoyida de los escrementos», concreta.
Por esti motivu, l’Alcaldía llinda a un máximu de trés vegaes al día los paseos de les mascotes y con una sola persona, ensin acompañantes. Exceptúense les families monoparentales que nun puedan dexar a los sos fíos y fíes solos en casa. Amás, establézse que los paseos tienen de ser curtios y que la distancia percorrida dende la casa nun tendrá de superar los 200 metros.
Nun s’aconseya tener contactu con otres persones ni animales. Los perros tienen de dir ataos en tou momentu y los consideraos peligrosos, con bozal. Caltiénse la obligación de recoyer les fieces y depositales, bien envueltes, nuna papelera o contenedor. Coles mesmes, encamiéntase llevar una botella con agua y deterxente pa esleir la orina y restos fecales que queden na cera. L’incumplimientu d’este midíes va poder ser oxetu de denuncia per parte de les autoridaes competentes.
