Dolce científicos asturianos presenten les sos propuestes contra’l cambéu climáticu

La conseyería de Ciencia, Innovación y Universidá axunta nun coloquiu abiertu a investigadores firmantes de la declaración internacional d'emerxencia climática

0
256

El Gobiernu asturianu sumóse a les acciones paraleles a la Cimera del Clima cola celebración d’un coloquiu abiertu nel qu’axuntó a científicos firmantes de la declaración internacional d’emerxencia climática. Los investigadores asturianos plantegaron una docena de propuestes. Les iniciatives tan céntrense en polítiques actives destinaes a amenorgar les emisiones de CO2, recuperar l’ecosistema y los recursos naturales, apostar por enerxíes anovables y, sobre manera, modificar los vezos de vida, tanto de consumu como de movilidá.

El pasáu mes de payares más de 11.000 científicos de 153 países publicaron una carta abierta na que sollerten de la necesidá de tomar midíes urxentes pa frenar el cambéu climáticu. Once d’esos investigadores pertenecen a instituciones asturianes. A estos científicos súmase otru firmante asturianu que soscribe’l manifiestu dende la Universidá d’Exeter.

El conseyeru de Ciencia, Innovación y Universidá, Borja Sánchez, foi l’encargáu de moderar l’alcuentru. Sánchez destacó’l papel de los científicos y la so voz autorizada pa marcar les pautes que tienen de guiar les actuaciones por parte de les alministraciones. El conseyeru tamién insistió na necesidá de tomar concencia por parte de la sociedá pa caltener la biodiversidá del planeta.

Los investigadores que soscribieron el documentu son Germán Orizaola, María José Bañuelos, Mario Quevedo de Anta, Jorque Marquínez, Patricia Martínez, Antonio Torralba, Alfredo Fernández Ojanguren García Comas, Juan Carlos Illera Cobo, Beatriz Romeu, Patricia Mateo Tomás, José Vicente Bao y Rolando Rodríguez Muñoz.

Estes son les propuestes llanzaes polos científicos asturianos pa combatir el Cambéu Climáticu:

  1. Esaniciar l’usu de combustibles fósiles y caltener los ecosistemes naturales.
  2. Establecer un modelu enerxéticu nuevu escontra fontes menos contaminantes.
  3. Camudar el nuestru sistema d’alimentación pa combatir los gases qu’incrementen l’efectu invernaderu.
  4. Impulsar actuaciones que favorezan la retención de carbonu na biota al traviés de la vexetación.
  5. Restaurar suelos y recuperar los ecosistemes naturales.
  6. Desenvolver midíes d’adaptación al cambéu climáticu.
  7. Promover un sistema de movilidá de les persones más sostenible.
  8. Estabilizar y amenorgar gradualmente la crecedera de la población humana.
  9. Impulsar polítiques rellacionaes cola equidá de xéneru y los derechos. humanos nos países en víes de desenvolvimientu.
  10. Les ciudaes como centros de mitigación del Cambéu Climáticu.
  11. Abandonar el modelu de crecedera ilimitada y el sobreconsumu.
  12. Educar na necesidá de camudar los nuestros vezos de vida.