El Gobiernu d’Asturies remata’l plan de choque de dependencia con nueves meyores nos servicios d’ayuda a domiciliu y atención residencial. El Boletín Oficial del Principáu (Bopa) publica güei dos resolvimientos de la Conseyería de Derechos Sociales y Bienestar p’avanzar na definición d’un nuevu modelu de cuidos de llarga duración que van beneficiar a más de 4.400 persones y que traen delles meyores: l’ampliación de les hores d’asistencia domiciliaria, la estensión de la gratuidá de la teleasistencia y la posibilidá de contratar a emplegaes del llar pa la prestación de cuidos non profesionales. Tamién se conxela la cuantía qu’abonen en conceutu de copagou les persones con dependencia que vivan en centros del YERA.
Estes nueves midíes, que se detallen de siguío, van beneficiar a más de 4.400 persones dependientes.
Atención residencial
El Principáu decidió conxelar la cuantía qu’abonen en conceutu de copagu les persones dependientes agospiaes en centros del organismu autónomu Establecimientos Residenciales para Vieyos (ERA). D’esta miente, van siguir pagando la mesma cantidá qu’hasta agora, en función de la so capacidá económica, y nun se-yos va aplicar la xubida de precios aprobada a principios de mayu pal restu de residentes.
L’adaptación de los precios públicos al costu real d’una plaza residencial nun va repercutir nes persones dependientes, polo que se garantiza’l caltenimientu del réxime económicu aplicable hasta agora. Esta iniciativa va beneficiar a 1.750 persones.
Teleasistencia
Derechos Sociales amplía’l calter gratuitu del serviciu de teleasistencia a aquelles persones dependientes que la so capacidá económica sía inferior a cuatro vegaes l’Indicador Públicu de Renta d’Efectos Múltiples (IPREM), esto ye, que perciban menos de 2.400 euros al mes. Esta midida va evitar qu’abonen esti serviciu casi 1.000 persones que nestos momentos tienen que pagalo. Esta decisión supón un pasu más escontra la universalización d’esti serviciu.
Prestación económica para curiaos na redolada
El Gobiernu abre la puerta a qu’aquelles persones dependientes que, por delles circunstancies, nun tengan la posibilidá d’aportar a nenguna de les prestaciones del sistema de dependencia, puedan percibir una ayuda económica para recibir asistencia nos sos llares por aciu la contratación d’una persona como emplegada del llar. Nestos casos, la emplegada del llar tien de comprometese a llograr la cualificación profesional que-y dexe trabayar nel sector de los cuidos, por aciu los cursos de formación que se pongan en marcha nesti campu. El Principáu envalora qu’abargana de 700 persones dependientes van poder beneficiase d’esta nueva opción anguaño.
Ayuda a domiciliu
El númberu máximu d’hores d’atención domiciliaria a personas dependientes amplíase.
