Toles persones finaes cola infección del nuevu coronavirus n’Asturies hasta’l pasáu llunes, 254 en total, carecíen dalguna patoloxía acomuñada previa. En concreto, más de la metá (58,6%) sufría hipertensión arterial y el 44,5% dalguna cardiopatía, especialmente isquémica. Amás, 28,1% yeren diabétiques y un quintu tenía Enfermedá Pulmonar Obstructiva Crónica (EPOC), asma o bronquitis.
Estes son dalgunes de les conclusiones del Estudiu de mortalidá con coronavirus n’Asturies, ellaboráu pola Dirección Xeneral de Salú Pública, y qu’analiza los decesos producíos na comunidá hasta’l 27 d’abril. El documentu reflexa que la tasa de mortalidá hasta esa fecha asítiase en 24,7 casos por cada cien mil habitantes.
Amás, na comparanza cola tasa nacional, realizada’l 25 d’abril, el Principáu rexistraba una tasa de 22,6 muertes por cada 100.000 habitantes, la metá que la media nacional (47,9), y cinco vegaes más baxa que nes comunidaes con mayor númberu de fallecimientos, como Madrid (116,3) y Castiella La Mancha (110,9). La edá promediu de les persones finaes álzase a 83,5 años, bien percima de la media de los casos positivos en COVID-19, que s’asitia en 61,7.
Nel estudiu apréciase que les edaes nel momentu del fallecimientu son superiores nes muyeres que nos homes. Nesti sentíu, ente la población femenina casi toles muertes por coronavirus asoceden a partir de los 80 años, ente que ente la masculina los decesos aumenten gradualmente cola edá. Por sexos, les proporciones son bien similares: les muyeres representen el 50,7%, con 129 fallecimientos, y los homes suponen el 49,3%, con 125 decesos.
Residencies de persones mayores
L’estudiu tamién analiza les 163 fallecimientos con coronavirus (63,2%) que se producieron hasta’l 27 d’abril en persones que vivíen en residencies de mayores. En términos xenerales, 6 de cada 10 fallecimientos producíos n’Asturies por COVID-19 fueron ente mayores institucionalizaos. Por sexos, les muyeres acopen el 61,3% de los decesos y los homes, el 38,7%. Nesti sentíu, cabe destacar que nestos centros de mayores moren más muyeres qu’homes. En global, de les 13.000 persones que viven en residencies n’Asturies, morrió con COVID-19 el 1,2%.
Les persones finaes que vivíen en residencies teníen una media d’edá más alta que’l restu de los casos de muerte por coronavirus, con casi 6 años de diferencia. Nesti sentíu, 76 superaben los 90 años y 56 yeren octoxenarios. Amás, estes persones institucionalizaes presentaben más factores de riesgu que’l restu de los finaos, especialmente demencia y insuficiencia renal.
