L’alderique al rodiu del asturianu ta, quiciabes, más presente que nunca. Un alderique que paez estremar a la sociedá en dos grupos: los que son favoratibles a la oficialidá y los que tan completamente a la escontra. Y yo entrúgome el por qué del posicionamientu d’estos últimos porque paezme incomprensible (y un absurdu) el que se niegue a estes altures el reconocimientu y el valor cultural d’esta llingua.
La UNESCO yá definió fai cuarenta años (na Conferencia Mundial sobro patrimoniu cultural en México en 1982) que’l patrimoniu abarca tolos valores de la cultura; materiales ya inmateriales, entendiendo qu’amás de los monumentos, obres d’arte, conxuntos arqueolóxicos, etc.; les tradiciones, formes de vida y d’espresión son señes d’identidá de los pueblos y dan-yos voz y sitiu nel mundiu.
Asturies tien un patrimoniu, de tou tipu, inmensu. Un patrimoniu del que toos tamos arguyosos. Cuántes vegaes diríamos qu’esti ye’l paraísu, presumiendo de paisaxes, d’historia y de monumentos. Tamién podemos presumir d’artesaníes, tradiciones, fiestes, lliteratura, música… Por nun falar de lo bien que se come equí, daqué qu’ensiguida sal a rellucir cuando, tando fuera, t’entruguen que d’ónde yes. Pues l’asturianu ye una amuesa más d’esti patrimoniu nuesu. Un motivu más pa tar arguyosos y pa presumir de los nuesos raigaños. Y cuidáu, qu’esto nun implica que’l que nun fale seya “menos asturianu”, como tampoco lo ye’l que nun-y gusta la fabada o nun subió nunca a Cuadonga.
Quiero dicir; nun fai falta ser creyente pa dase cuenta de la importancia y valor que tienen la Catedral y les ilesies prerromániques, nin críticu gastronómicu pa esfrutar del Desarme, nin turista pa perdese pelos pueblos. Tampoco fai falta ser falante pa da-y dignidá y reconocer l’asturianu.
Nun se pue negar la realidá; asina como la sidra ye la bebida propia d’Asturies, l’asturianu ye la llingua d’esta tierra. Nesti sen, tar a la so escontra ye refugar direutamente la cultura. Y ensin cultura quédanos namás que la inorancia.
