Xixón al día

Etiqueta: PSOE

  • Sánchez anuncia que va llamar a Iglesias pa retomar les negociaciones

    Sánchez anuncia que va llamar a Iglesias pa retomar les negociaciones

    Pedro Sánchez va llamar güei mesmu a Pablo Iglesias pa «poner en marcha dos equipos qu’empiecen a falar de lo qu’importa a los ciudadanos». El secretariu xeneral del PSOE y presidente del Gobiernu en funciones llamó a «aparcar les diferencies», en referencia a si lo que s’alcuerda ye un gobiernu de coalición o un gobiernu de cooperación. Nesti sentíu, sorrayó que lo qu’importa a la ciudadanía nun ye tantu quién va ser el ministru de Trabayu, sinón «reconocer la salú bucodental dientro del sistema nacional de salú» o «si va crease empléu de calidá”.

    Nuna entrevista en ‘Los desayunos’ de TVE, Sánchez sorrayó qu’España precisa un gobiernu. «El que nós tamos proponiendo ye un gobiernu progresista, y para eso tamos marcando como sociu preferente a Xuníes Podemos». Señaló que quieren un executivu «que nun dependa de los independentistes». Por eso, dixo «tamién tamos mirando a Ciudadanos y al PP, pa que con la so astención faciliten la constitución d’un gobiernu».

    El presidente en funciones defendió la fórmula d’un gobiernu de cooperación. Sánchez recordó les «discrepancies de fondu» que’l PSOE caltien con XP en temes fundamentales como Cataluña. D’esta manera, preguntóse si la formación morada sofitaría l’aplicación del 155 en casu d’una declaración unilateral d’independencia per parte de la Generalitat.

    Coles mesmes, anunció que nel so discursu de investidura va ufiertar a PP, Ciudadanos y Podemos la reforma del artículu 99 de la Constitución pa que gobierne la llista más votada.

  • Josep Borrell renuncia al acta d’eurodiputáu

    Josep Borrell renuncia al acta d’eurodiputáu

    Josep Borrell renuncia al escañu d’eurodiputáu. El cabezaleru del PSOE nes caberes elecciones europees del 26-M anunció esti miércoles la so decisión. La intención del ministru d’Esteriores en funciones ye caltener la so actividá nel Conseyu de Ministros hasta la investidura. «Comuniqué-y a Antonio Tajani que renuncio a ser diputáu nel próximu Parlamentu Européu. Ye una decisión tomada en comuña con Pedro Sánchez. Dambos pensamos que nes actuales circunstancies soi más necesariu como ministru d’Esteriores».

    Nun primer momentu, Josep Borrell contaba dexar el Gobiernu nel Conseyu de Ministros d’esti vienres. Sicasí, nun va participar como eurodiputáu na sesión constitutiva del Parllamentu Européu esti martes. Pel momentu, Borrell va siguir formando parte del Executivu en funciones.

  • Marcelino Marcos, nuevu presidente de la Xunta Xeneral

    Marcelino Marcos, nuevu presidente de la Xunta Xeneral

    Marcelino Marcos foi escoyíu esti llunes nuevu presidente de la Xunta Xeneral. La candidatura del diputáu socialista, la única presentada, algamó la mayoría abosluta. Marcelino Marcos cuntó colos votos a favor de los venti diputados de la FSA-PSOE, los cuatro de Podemos y los dos d’Izquierda Xunida. La tamién socialista Maria Celia Fernández foi escoyida vicepresidenta primera de la mesa. El vicepresidente segundu va ser el popular Pablo Álvarez-Pire. El diputáu d’Izquierda Xunida, Ovidio Zapico, foi nomáu nuevu secretariu primeru. Armando F. Bartolomé, de Ciudadanos, va ser secretariu segundu.

    D’esta manera, queden fuera de la mesa Podemos y Vox. La formación morada venía defendiendo que la representación nel órganu cimeru de la Xunta Xeneral fuera proporcional a los resultaos electorales. L’alcuerdu algamáu ente la FSA-PSOE ya IX y ente’l PP y C’s déxalos ensin presencia. «La mesa de la Xunta Xeneral ye agora menos plural que con Javier Fernández. La FSA-PSOE, PP, C’s ya IX repartiéronse la mesa dexando fuera a Podemos y a los sos 60.000 votantes», escribió la formación morada en Twitter.Tampoco nun va tar Vox. La formación d’ultraderecha entra per primer vegada na Xunta Xeneral con dos representantes: Ignacio Blanco y Sara Álvarez.

    La Xunta Xeneral quedó constituyida esti llunes. D’esta manera entama la XI llexislatura nel Parlamentu asturianu. Al actu asistió la vicesecretaria xeneral del PSOE, Adriana Lastra.

  • L’alcaldesa de Xixón xúbese’l sueldu

    L’alcaldesa de Xixón xúbese’l sueldu

    El sueldu de l’alcaldesa de Xixón va xubir hasta los 67.529 euros. L’incrementu de les retribuciones previstu pol nuevu equipu de gobiernu tamién va beneficiar a los conceyales lliberaos, que van pasar a ingresar 6.600 euros más que na pasada llexislatura. Ye la propuesta de la nueva responsable de Facienda, Marina Pineda. De salir alantre, el sueldu de la primer edil va medrar hasta los 67.529 euros, 2.584 euros más de los 64.945 qu’ingresaba Carmen Moriyón.

    El sueldu de l’alcaldesa de Xixón nun va ser l’únicu que xuba. Los ediles lliberaos tamién van ver incrementada la so asignación. De 52.073 euros brutos al añu a cerca de 58.000. Nel casu de les lliberaciones parciales, los asignaciones van pasar de los 39.000 a los 43.000 euros. Esta decisión llega depués de dos mandatos colos sueldos conxelaos. La intención agora ye que los conceyales lliberaos de cada grupu políticu vean ameyoraes les sos condiciones pa equiparase coles d’un director xeneral.

    «Supón un mui mal entamu del mandatu», llamenta Yolanda Huergo

    La propuesta de xubida de los sueldos de los conceyales va salir previsiblemente alantre al cuntar cola única oposición de Podemos-Equo. Les tres representantes de la coalición soscribieron un compromisu éticu qu’inclúi la llimitación salarial. «Supón un mui mal entamu del mandatu», aseguró Yolanda Huergo, vocera de la coalición.

    No que sí parez que va haber alcuerdu ye nel repartu de les lliberaciones. El Conceyu tien llimitaes a 18 el total de lliberaciones a repartir ente los conceyales del Plenu. El PSOE va quedase con diez d’elles, dos van corresponder a Ciudadanos como primer fuercia de la oposición, el restu de grupos van quedar con una caún.

  • El PSOE afita’l so poder municipal con 53 alcaldíes

    El PSOE afita’l so poder municipal con 53 alcaldíes

    La Federación Socialista Asturiana afita’l so poder municipal como primer fuercia municipal d’Asturies. Los plenos de constitución de les corporaciones locales celebraos esti sábadu diéron-y a los socialistes un total de 53 alcaldíes. Los candidatos del PSOE gobernarán n’Ayande, Belmonte, Boal, Cabrales, Cabranes, Candamo, Casu, Castropol, Corvera, Cuideiru, El Franco, Gozón, Grandas de Salime, Eilao, Llaviana, Muros, Nava, Onis, Pezós, Piloña, Ponga, Pravia, Proaza, Les Regueres, Ribedeva, La Ribera, Santalla d’Ozcos, Santiso d’Abres, Santo Adriano, Sobrescobiu, Somiedu, Taramundi, Tinéu, A Veiga, Vilanova d’Ozcos, Villaviciosa, Yernes y Tameza, Llanera, Ayer, Carreño, Colunga, Degaña, Navia, Parres, Ribesella, Samartín del Rei Aurelio, Siero, Tapia, Valdés y Cangas. Amás, recuperen les alcaldíes de Xixón y Llangréu y revaliden la d’Avilés.

    El secretariu de Política Municipal de la FSA-PSOE, Iván Fernández, valoró la toma de posesión de los alcaldes socialistes. «Volvemos ser la fuerza municipalista más importante n’Asturies. Gobernamos en 53 conceyos, en 37 d’ellos con mayoría absoluta». A xuiciu de Fernández estes cifres «demuestren que’l PSOE ye’l partíu que más se paez a Asturies». Los 53 alcaldes socialistes ponen de manifiestu la confianza de la ciudadanía «porque somos un partíu seriu».

    Felicitación del secretariu xeneral

    «Tol mio ciñu a los 437 conceyales socialistes que güei tomaron posesión del so cargu», manifestó Adrián Barbón. El secretariu xeneral de la FSA-PSOE asistió a la toma de posesión como alcaldes d’Iván Fernández, en Corvera, y de Julio García, en Llaviana. «Sois la nuesa bandera, la meyor representación del nuesu compromisu con Asturies. La nuesa forma de faer política, pegada a la cai, refuerza’l nuesu compromisu col futuru», destacó.

  • L’asamblea d’IX afita’l ‘sí’ a la investidura d’Ana González

    L’asamblea d’IX afita’l ‘sí’ a la investidura d’Ana González

    L’asamblea d’Izquierda Xunida (IX) afitó na tarde del xueves el sí de la coalición a la investidura d’Ana González. El conceyu, que cuntó cola presencia de 97 persones acreditaes, sofitó por unanimidá la propuesta. D’esta manera, Aurelio Martín, l’únicu conceyal col que va cuntar la formación na Casa Conceyu, va apoyar la candidatura de la socialista Ana González a la investidura.

    La sintonía ye plena ente dambes fuercies. Esta selmana, PSOE ya IX ficieron públicu un manifiestu conxuntu nel qu’amosaben el so compromisu de trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista.

    La candidata socialista nun va algamar, salvo sorpresa d’última hora, la mayoría absoluta nel Plenu d’investidura. El sí afitáu pola asamblea d’IX nun-y da a Ana González los votos suficientes pa salir escoyida en primer votación. La socialista nun va cuntar col sofitu de les tres conceyales de Podemos-Equo. La coalición anunció esta selmana la so decisión d’astense. La candidatura lliderada por Yolanda Huergo plantegó al PSOE un decálogu de midíes sobre les que trabayar, pero «los socialistes respondieron postponiendo les conversaciones».

  • PSOE ya IX van alcordar un programa de gobiernu conxuntu

    PSOE ya IX van alcordar un programa de gobiernu conxuntu

    Izquierda Xunida (IX) va votar a favor de la investidura de la candidata del PSOE. Dambes formaciones van trabayar pa concretar un programa de gobiernu conxuntu depués del Plenu del sábadu. Ana González valoró la decisión de la coalición y destacó’l compromisu de les dos fuerces polítiques pa «activar Xixón» nel mandatu que ta a piques d’entamar.  «Van ser cuatro años de capital importancia pola cantidá de problemes qu’hai que resolver», asegura la candidata socialista. «Hai muchos proyectos qu’impulsar tres los ocho años de paralises de Foru».

    González insitió en que les midíes que se van acometer tendrán de ser frutu d’un alderique sele y fondo, pero sobremanera, d’un trabayu responsable que va empezar el sábadu. Sicasí señaló que l’equipu de gobiernu va trabayar «dende la izquierda» siendo «conscientes de qu’hai cuestiones que van riquir d’un ampliu consensu«. Fizo referencia al plan de víes, proyectu sobre’l qu’aseguró que «intentaráse sumar a tolos grupos políticos».

    Ana González destaca que l’equipu de gobiernu va trabayar «dende la izquierda»

    Respectu al decálogu presentáu por Podemos-Equo y a la posibilidá d’aceptalo de cara a cuntar col votu de los moraos nel plenu del sábadu, González reconoció que prefier dexar les coses fluyir. «Nun ye necesariu un trabayu pocu fondu y pocu seriu col únicu oxetivu de paecer que cuentu con más sofitos de los que tengo», dixo. Nesti sentíu reivindicó la necesidá d’empezar un trabayu de fondura que defina claramente’l presente, pal futuru de Xixón. «El presente nun ye’l 15, empieza’l 16», señaló.

    Ana González emplazó a Podemos a aconceyar na primer selmana de xunetu. Esta posición  llevó a les tres conceyales de la formación morada a tomar la decisión d’astenese nel Plenu d’investidura. Yolanda Huergo, vocera de la coalición, aseguró que «gustáranos concretar los asuntos nos que tamos d’alcuerdu» enantes de la votación.

  • Pedro Sánchez ofréce-y a Iglesias un «Gobiernu de cooperación»

    Pedro Sánchez ofréce-y a Iglesias un «Gobiernu de cooperación»

    Entendimientu. Pedro Sánchez y Pablo Iglesias acercaron postures esti martes en La Moncloa. El presidente en funciones acercó postures col candidatu de Xuníes Podemos depués de recibir l’encargu del rei pa formar Gobiernu. El candidatu socialista a la reelección nun compareció ente los medios depués del conceyu. Quien sí lo fizo foi Adriana Lastra, vicesecretaria xeneral del PSOE y vocera socialista nel Congresu de los Diputaos. La diputada asturiana sorrayó qu’esiste «voluntá d’alcuerdu» ente’l PSOE y Xuníes Podemos pa que la llexislatura entame «cuanto antes» con un «Gobiernu progresista» y «de cooperación”.

    Nuna rueda de prensa posterior a la xunta caltenida por Sánchez y Iglesias, Lastra dixo que pa los socialistes esti primer alcuentru foi bien satisfactoriu. «Constatóse la voluntá d’alcuerdu ente la izquierda» y que’l PSOE ta determináu a trabayar en «buscar fórmules pa gobernar la complexidá».

    La vocera del PSOE recordó, amás, que «nos postreros 12 meses» demostróse que «ye posible l’entendimientu de la izquierda». Destacó l’alcuerdu presupuestariu algamáu y la collaboración de socialistes y XP pa poner en marcha midíes como la recuperación de la sanidá universal, la revalorización de les pensiones y la derogación del impuestu al sol. «Estes midíes ameyoraron la vida de los españoles y demostraron que la izquierda sabe entendese», recordó.

    Por too ello, resumió, hai «grandes coincidencies programátiques» y esisten «les meyores blimes para siguir desenvolviendo una axenda progresista». Lastra amestó que se van buscar fórmules para un Gobiernu de «cooperación plural, abiertu, integrador, incluyente» y onde tengan cabida personalidaes que sían «referentes» nos sos respectivos ámbitos.

  • Los diputaos de Vox, al gallineru del Congresu

    Los diputaos de Vox, al gallineru del Congresu

    Los 24 diputados de Vox van quedar asitiaos nel gallineru, como se conoz la última fila del Congresu de los Diputaos. Ye una de les decisiones de la mesa de la Cámara Baxa, qu’esti martes alcordó la distribución de los grupos parlamentarios nel hemiciclu. L’alcuerdu salió alantre colos votos de los cinco representantes del PSOE ya Xuníes Podemos, l’astención de los dos del PP y el votu en contra de los dos Ciudadanos.

    D’esta manera, los diputaos de Vox van quedar asitiaos nes dos últime files del salón de plenos. La formacion d’ultraderecha nun tien representación nel muérganu de dirección de la Cámara Baxa. Los representantes del PP van siguir sentaos a la derecha del hemeciclu y, xunto a ellos, el grupu parllamentariu de Ciudadanos.

    El PSOE va ocupar los escaños a la izquierda de la cámara, como yá facía hasta agora. Nel centru, van situase los representantes d’Esquerra, PNV y el grupu mistu. Van compartir esti espaciu con Xuníes Podemos, cola escepción de Pablo Echenique. El diputáu por Zaragoza va ocupar un asientu nel gallineru, la única parte del salón accesible pa la so siella de ruedes.

  • Álvaro Muñiz: «Ana González va tener la oposición que Moriyón nun tuvo»

    Álvaro Muñiz: «Ana González va tener la oposición que Moriyón nun tuvo»

    Foru va llevar a cabu una una «oposición lleal» en Xixón. Álvaro Muñiz tresmitió-y a Ana González que la so formación va tener «la oposición que Carmen Moriyón nunca tuvo: rigorosa y cola mano tendida siempres al diálogu y los alcuerdos». Fízolo mientres un conceyu col Comité Negociador del PSOE de Xixón, que calificó de «cordial y constructivu».

    Muñiz añadió que «Foru, como únicu partíu que gobernó esta ciudá amás del PSOE, va liderar l’alternativa». Aseguró nun compartir «el modelu de los socialistes», pero reconoció «que ye l’escoyíu democráticamente polos xixoneses». Anunció que la formación nun va presentar candidatu a l’Alcaldía y va abstenese na investidura d’Ana González. «Ye un xestu qu’esperamos seya recibíu como una invitación a esi diálogu, esa llealtá institucional que Carmen Moriyón, por desgracia, nunca esfrutó”. Muñiz añadió, amás, que «el trespasu de poder va ser tresparente, llimpio, y sobremanera, lleal a los intereses de tola ciudá».

    Muñiz acudió al conceyu acompañáu polos tres conceyales que van representar a la formación na Casa Conceyu: Jesús Martínez Salvador, Ana Braña, y Rubén Hidalgo. Hai que recordar qu’Álvaro Muñiz renunció al acta de conceyal. «Voi siguir lliderando’l partíu y voi tar arreyáu al 100% en tolo qu’asoceda nel Conceyu de Xixón y nel grupu municipal», esplicó entós. Y detalló que la so decisión taba motivada pol deséu de que’l númberu cuatro de la llista, Rubén Hidalgo, ocupara un asientu nel Plenu.